XAKEKO TALDEKAKO EUSKAL LIGA.

(2014ko urtarrilaren 11tik martxoaren 8ra).

 

 

 

OHOREZKO MAILA.

 

 

 

         LIGA GORI-GORIAN JARRI DA.

 

            Asko estutu da Euskal Liga, bi txanda oso interesgarrien zain.

 

Grosek San Viatorren oztopoa zuen aurrean eta ez zuen emaitza biribilik lortu. Alejandro Francok, zuriekin jokatu arren, berdinketa besterik ez zuen eskuratu David Astasioren aurka. Santiago Gonzalez De la Torrek ere, beltzekin, ezin izan zuen Arabako txapelduna gainditu: Berdinketa, Igor Villaltaren aurka. Azkenean, 3-1 Grosen alde.

 

            Sestaok, ordea, azken sailkatuaren bisita baliatu zuen Grosi puntu bateko aldea murrizteko: 4-0, Easori. Bien artean puntu erdia dago. Gros aurretik eta egutegi zertxobait hobearekin.

 

            Orvina A – Zuri Baltza lehian jaitsierako postu bat zegoen jokoan. Orvinakoak ez dira oso txukun aritu orain arte eta halaxe bukatu behar dute: Hil ala biziko neurketekin. Iruñekoak ziren faborito, baina berriz ere arazoak izan zituzten. Gerardo Fernandez sasoi oso onean dabil eta Orvinako Nazioarteko Maisua (Unai Garbisu) gainditzeko gai izan zen. Berdinketa (2-2) izan zen emaitza. Hala ere, puntu eta erdiko aldea mantendu du Orvinak eta, Easorekin jokatu behar dutela kontutan hartuta, nahiko izan daiteke.

 

            Batalla eta Donibane Kirol Elkartea A taldeen artean hirugarren postua zegoen jokoan. Ezpatak zutik mantendu dituzte: 2-2. Donibanek puntu eta erdiko abantaila dauka, baina Sestao A jaso behar du hurrengo asteburuan.

 

            Bosgarren postuaren bila zebiltzan Arrasate-Arlutz eta Conteneo. Hauek ere berdinean amaitu zuten: 2-2. Egutegiari begira, Arrasate-Arlutzek dauka aukera Conteneoren aurretik geratzeko, orain puntu erdiz atzean badago ere.

 

            Zortzigarren txandak ikusmina Iruñera eramanen du. Hirugarren sailkatua bigarrenaren aurka arituko da: Donibane – Sestao. Bizkaitarren helburua izanen da 3’5 puntu ateratzea. Ikusiko dugu lortzen duten.

 

            Bitartean, Donostian, Grosek ez du erraza izanen Batallaren aurka. 4-0 geratzea izanen du helburu, baina kostako zaio hori erdiestea.

 

            Gainontzeko hiru lehietan jaitsiera izanen dute jokoan. Orvinak Easoren aurrean aukera aprobetxatu behar du, arriskua behin betiko uxatzeko. San Viator, ustekabean, borroka honetan sartuta dago eta Bilbon, Conteneoren aurka, emaitza ona behar du. Zuri Baltzak sailkapena estutzen saiatu behar du. Orain arte, Arrasate-Arlutz Ligako ustekabea izan da, baina larunbatean porrot handia pairatuz gero pikutara bidal dezake orain arte egindakoa.

           

            2014-02-22.

 

                Iturria: Euskal Xake Federakuntza.