XAKEKO TALDEKAKO EUSKAL LIGA.

(2014ko urtarrilaren 11tik martxoaren 8ra).

OHOREZKO MAILA.

AZKENEAN GROS TXAPELDUN ETA ZURI BALTZA LEHENENGO MAILARA.

2014ko Euskal Ligak berea egin du. Azkenean Grosek kendu dio titulua Sestaori. Hamaikagarren titulua, 14 urteetan.

3-1eko emaitza behar zuen Sestaok eta agian horrek arriskatzera bultzatu zituen Sestaoko jokalariak. Garaipenak, ordea, Grosekoentzat. Alejandro Francok Alfonso Romero gainditu zuen, Iñigo Argandoñak Mario Gomez eta Patrice Etchegarayk Jesus Maria Iruzubieta. Gabriel Del Rio izan zen Sestaorentzat puntua lortu zuen bakarra, Santiago Gonzalez De la Torre azpiratuta.

Lau mahaietan elo gehiago zuen Sestaok, gutxigatik bazen ere. Bi oilarrak dira Euskal Ligan, baina hasieran Sestao agertzen zen aurretik.

Jaitsierako postuetan ez zen ustekaberik egon. Zaldi Baltzak nahiko txapelketa txukuna egin du, baina, Conteneoren aurka 2’5-1’5 galduta, ezin izan zuen jaitsiera saihestu.

Puntu erdia besterik ez, Zuri Baltza eta San Viatorren artean. Ez zen espero Gasteizko taldea hain larri ibiltzerik. Batallaren aurka garaipena eskuratuta (1’5-2’5) erdietsi zuen mailari eustea. Zaldi Baltzako Gerardo Fernandez azkeneko egunean aritu izan balitz...

Arrasate/Arlutz ere arriskuan zegoen, aurreko astean huts egin ondoren. Easoren aurka 4-0 eginda arrisku hori uxatu zuen, arazorik gabe. Gainera, bosgarren postua ez, laugarrena lortu zuen, Batallaren aurretik geratuta.

Orvina A Donibane Kirol Elkartea A-ren aurka zerbait egiteko behartuta zegoen. 2-2ko emaitzak mantentzea ekarri zion, zazpigarren postuan amaituta. Iruñeko beste taldeak askoz hobeto bukatu zuen. Donibane Kirol Elkartea Ak hirugarren postuarekin podiuma harrapatu zuen.

2014-03-08.

Iturria: Euskal Xake Federakuntza.