Larunbata, 2014ko martxoak 15a.

Alejandro Franco. Gros xake taldeko jokalaria.

“Ligak gora egin du, baina asko dago egiteko harrobian”.

Josu Tornay.

Gros xake taldeak garaipen zerrenda handitzen segitzen du. Euskal Liga irabazi berri du 11. aldiz, Sestao faboritoa gaindituta. Horretan zerikusia izan du Alejandro Franco nazioarteko maisuaren jardunak (Madril, 1982). Franco da taldeko lehen taula.

Nola laburtuko zenuke aurtengo Euskal Liga?

Azken urteotako ligarik zirraragarriena izan da. Sestao eta Grosen arteko borroka estua izan da, eta azken txanda jokatu arte egon da estu sailkapena. Horrez gain, maila ez galtzeko lehia ere oso estua izan da. Oso liga berdindua izan da, eta beste urte batzuetan baino ezusteko gehiago egon dira.

Laugarren jardunaldian Sestaok Arrasate-Arlutzen kontra galdu izanak bidea erraztu zizuen. Nola kudeatu duzue gero alde hori?

Emaitza horrek ez zuen asko aldatu gure estrategia. Norgehiagoka guztietan puntu guztiak irabazten saiatzen gara, aurkariari edo txandari erreparatu gabe.

Azken txandan erabaki zen, hala ere, titulua, Sestaoren aurkakoan. Nolakoa izan zen norgehiagoka?

Espero zen moduan, oso berdindua eta zirraragarria. Edozein gauza gerta zitekeen. Zorionez, Patrice Etxegarai baionarrak bere partida bizkor irabazi zuen Jesus Iruzubietaren kontra. Horrek asko motibatu zuen taldea. Beste partidetan posizioak bat-batean aldatu ziren. Gaizki zeudenak hobetu egin ziren, eta ondo zeudenak, okertu. Horietako bitan puntua guretzat izan zen, eta 3-1 irabazi genuen azkenean.

Sestaok eta Grosek politika ezberdinak dauzkate taldeak osatzeko. Uste duzu zuena hobea dela? Etxeko jokalarien aldeko apustua kanpoko fitxaketena baino erabaki hobea izan da?

Nire ustez, bion fitxaketa politika ez da horren ezberdina. Ezberdintasun handiena da guk bertako maisuekin oinarri sendoa osatzea lortu dugula; eta hori zaila da, maisu gutxi daudelako Euskal Herrian. Horregatik, Sestaok guri irabazteko kanpora jo behar du. Logikoa da, gainera, eta ados nago. Aukera izanez gero, zergatik ezin du klub batek xakeko Messi fitxatu? Horrek oihartzun handia emango lioke gure ligari nazioartean, eta hori ona da guztiontzat.

Zein da Euskal Ligaren maila? Eta zein garapen izan du azken urteotan?

Orain dela urte batzuk baino hobeto gaude. Alde batetik, Nafarroako talde on bat dago: Donibane. Ohorezko Mailara igo eta goiko postuetan dabil, eta hori berri ona da. Bestalde, herriko taldeek Arrasate-Arlutzek edo Irungo Batallak gero eta estuago hartzen dituzte talde indartsuenak. Gure liga urtez urte hobea da.

Eta nola ikusten duzu jokalari gazteen garapena?

Jokalari gazte batzuen garapena ez da eten, eta jada funtsezkoak dira euren taldeetan: Asier Etxagibel Arrasaten, Paulo Alberdi Zuri Baltzan... Baina salbuespenak dira. Asko dago egiteko eta hobetzeko harrobian.

Zeintzuk dira Gros taldearen hurrengo erronkak?

Orain Linaresen (Espainia) jokatuko den Espainiako Txapelketan jarri behar dugu arreta. Ondoren, Bilbon jokatuko den kluben arteko Europako Txapelketa prestatzen ariko gara bete-betean. Bi torneo horiek oso gogorrak izango dira, eta oso ondo prestatu behar dira itxura ona emateko.

© berria.info