Asteartea, 2007ko martxoak 13.

Gros berriz garaile Euskal Ligan.

Sestaok lan bikaina egin du txapelketan, baina ez du lortu donostiarren ibilbidea apurtzea.

josu tornaY.

DonostiA.

Grosek 3,5 puntu atera behar zituen Euskal Ligako Ohorezko mailako azken txandan garaipena ziurtatzeko. Emaitza horrekin, nahiz eta Sestaok 4-0 irabazi, donostiarrak txapeldunak izango ziren. Asmo horrekin talde sendoa prestatu zuen Grosek larunbatean Errenterian (Gipuzkoa): Christian Bauer frantziarra, Hicham Hamdouchi marokoarra, Glen Flear ingelesa eta Alberto Andres espainiarra. Asmoa laugarren taulan Cifuentesek jokatzea zen, baina txiletarra gaixotu egin zen, eta Andresekin osatu zuten taldea. Taldeko euskal jokalariek, Iñigo Argandoñak eta Santi Gonzalezek, atseden hartu zuten. Errenteriako Sustapen-Beraunen aurka jokatu zuten donostiarrek, eta Bauerrek, Flearek eta Andresek irabazi egin zuten. Hamdouchik, aldiz, galdu egin zuen, Juan Benito Imaz errenteriarraren kontra.

Sestao ez zen 4-0 lortzeko gai izan. Iruñeko Oberenaren kontra jokatu zuten bizkaitarrek. Nafarrak jaisteko postuetan zeuden, eta emaitza bikaina, ia ezinezkoa, behar zuten mailari eusteko. Sestao Naturgas taldea Mario Gomez santurtziarrak, Fermin Gonzalez katalanak, Carlos Varas txiletarrak eta Sergio Trigo sestaoarrak bete zuten. Printzipioz, Oberena baino talde sendoagoa zen Sestao, posible ikusten zen lau partidak irabaztea. Baina Miguel Navarrok Gomez maisu handia gainditu zuen eta Borja Zamarbidek Gonzalezi irabazi zion. Varasek eta Trigok euren partidak irabazi zituzten, eta bina amaitu zen nafarren eta bizkaitarren arteko lehia.

Hala ere, liga zirraragarri honetan interesa ez da bakarrik goiko postuetan egon. Jaitsiera saihesteko ere borroka egon da beste lehia batzuetan. Alde batetik, Abadiñok eta Aretxabaletako Arlutzek erraz lortu zuten helburua, 2-2 berdinduz. Emaitza horrekin bi taldeok ia erabat ziurtatu zuten beste urtebetez Ohorezko Mailan jokatzea. Easok, berriz, lehia zaila zeukan Pasai Donibaneko Batallaren kontra. Donostiarrak jaitsiera postuetan zeuden, eta garaipenaz gain, Sustapen-Beraunen hondamena behar zuten. Helburua lortu zuten, 1-3 irabazi baitzuten eta Sustapen-Beraunek galdu egin baitzuen. Bilboko Rey Ardidek eta Iruñeko Orvinak 2-2 berdindu zuten. Emaitza horrekin Bilboko alde zaharreko talde historikoa jaitsi egin da.

Azken urteetan Grosek Euskal Liga erraz irabazi du, baina aurten oso lehia interesgarria izan da. Sestao Naturgasek osatutako taldeak torneo polita egin du, eta bertako jokalariek ere euren tokia izan dute hasierako laukotean. Hain zuzen ere, Sestaok Gros gainditu zuen lehen txandan, eta hortik aurrera alde txikiak izan dira sailkapenean. Azkenean, Grosek irabazi du berriro, eta Sestao eta Batalla Espainiako Lehen Mailako Txapelketa jokatzeko sailkatu dira. Bestalde, mailako bi talde historikok, Sustapen-Beraunek eta Rey Ardidek, maila galdu dute, Iruñeko Oberenarekin batera.

LEHEN MAILAN, ZURI-BALTZA NAGUSI. Euskal Ligako Lehen Mailan berdinketa handia egoten da urtero. Aurten ere azken sailkatuak gai izan dira goikoak gainditzeko, eta mota guztietako emaitzak ikusi izan dira. Bilboko Zuri-Baltza izan da txapelduna, eta Ohorezko Mailara igotzea lortu du, Gasteizko San Viator eta Arabako Subijanako Ruta de Europarekin batera. Azken txandan igotzeko postuak ia erabakita zeuden. Ruta de Europak erraz eta bizkor lortu zuen Barakaldoko taldearekin igoera ziurtatzea (2-2) eta San Viatorrek astindua eman zion Sustapen-Beraun B-ri (0,5-3,5). Zuri Baltzak bina berdindu zuen Gros B taldearekin.

Bestalde, jaitsiera saihesteko lehia benetan gogorra izan da. Sustapen-Beraun B-k maila galdua zuen azken jardunaldia jokatu aurretik, baita Rey Ardid B-k ere (Rey Ardid A taldea azkena zen Ohorezko Mailan). Jaitsierako beste bi postuak Gasteizko Egidazuren, Arrasate-San Andresen eta Barakaldoren artean egon behar ziren. Barakaldok bina berdindu ondoren, Egidazuk eta Arrasatek emaitza potoloak behar zituzten euren arteko lehian (Egidazuk 3-1 eta Arrasatek 0-4). Lau partidak luzeak izan ziren, eta bi taldeetako jokalariek arriskatu egin zuten garaipena lortzeko. 1,5-2,5 irabazi zuen Arrasatek, baina emaitza ez zen ona izan ez batentzat ez bestearentzat, eta biak, Sustapen-Beraunekin batera, Preferente Mailan ariko dira datorren urtean.

############

SaiLKaPenA.

OHOREZKO MAILA.

1. Gros 28,5 puntu.

2. Sestao 26,5 puntu.

3. Batalla 19,5 puntu.

4. Orvina 19,5 puntu.

5. Arlutz 16,5 puntu.

6. Abadiño 15,5 puntu.

7. Sustapen-Beraun 14 puntu.

8. Easo 14 puntu.

9. Oberena 13 puntu.

10. Rey Ardid 13 puntu.

############

© berria.info