berria.info

Igandea, 2007ko apirilak 22.

«Erokeria da xaketik bizi nahi izatea».

miguel navarro FIDE maisua eta aurtengo Euskadiko txapelduna.

Euskadiko Txapelketa irabazi berri du lehen aldiz. Argi du beretzat xakea «zaletasuna» besterik ez dela.

JOSU TORNAY.

DonostiA.

LANDER F. ARROIABE/ARGAZKI PRESS.

Ia astebete joan da Miguel Navarrok Euskadiko Txapelketa irabazi zuenetik (Iruñea, 1982). Oraindik, hala ere, zorionak jasotzen segitzen du. Pozik dago, eta harro, ez zuelako espero maila handiko aurkariekin lehian txapela lortzea.

Hasi aurretik txapela lortzeko itxaropena zenuen?

Ez. Denbora dezente jokatu barik neraman, eta ez nengoen sasoiko. Hala ere, banekien zazpi txanda jokatuta agian ez zela hainbeste igarriko nire sasoi eskasa.

Ez zenuen ondo hasi txapelketa.

Ez. Egia esan, nahiz eta azken bi partidak irabazi, Mario Gomez barne, ez nuen ere pentsatzen txapelduna izango nintzela berdinketa hausteko sistemari esker. Uste nuen Santi Gonzalezek irabaziko zuela, agian beti bere jakintza zabala mirestu izan dudalako, eta lagun handia dudalako.

Asko hitz egin da erritmo berriari buruz. Zein neurritan dauka eragina zure ustez?

Nik beti erritmo geldoagoak nahiago izan ditut, xakea gustatzen zaidalako. Asko gozatzen dut posizioak aztertzen. Baina egungo erritmoekin partida asko loteria bat bihurtzen dira, eta azken segundoetako akats potoloekin erabakitzen dira.

Mario Gomez faborito nagusia zen, eta, azkenean, ez da lehen hiru sailkatuen artean geratu. Uste duzu larregi arriskatu zuela partida batzuetan?

Bakoitzak bere tankera dauka, eta Mariok partida guztiak borrokatu ditu, nahiz eta asko arriskatu. Bere jokatzeko era da, besterik ez.

Mikel Huerga gazte nafarrak garapen azkarra izan du. Noraino irits daiteke?

Ni nahiko zorrotza naiz berarekin. Nire ustez erokeria da xaketik bizi nahi izatea. Horregatik ez zait zuzena iruditzen berak ikasketak alde batera uztea. Baina bakoitzak bere erabakiak hartzen ditu. Daukan zaletasuna eta ematen duen denborarekin segur aski urte eta erdi barru nazioarteko maisua izango da. Baina maisu handiaren titulua oraindik urrun ikusten dut berarentzat. Euskadiko Txapelketa, berriz, edozein urtetan lor dezake. Baina datorren urterako faboritoak berriro Mario Gomez eta Santi Gonzalez izango dira. Besteok urrats bat atzerago gaude, hori argi dut.

Zelan ikusten dituzu belaunaldi berriak Euskal Herrian?

Jokalari gazte onak daude, baina Felix Izeta, Mario Gomez, Txelu Fernandez eta beste batzuen lekukoa hartzea oso zaila izango da, ia ezinezkoa. Eurek xakera dedikatzeko aukera izan zuten. Aldiz, egungo gazteentzat zaletasuna baino gehiago ezin da izan.

Eta Nafarroan zer-nolako maila dago?

Nafarroan belaunaldi berriek dagoeneko hartu dugu lekukoa. Unai Garbisu lehen nazioarteko maisu nafarra da. Gero Mikel Huerga eta ni gaude, nazioarteko maisuko norma batekin. Miguel Rada ere gertu dabil. Azken urteotan Nafarroako maila jende gazteari esker igo da.

Zelan hasi zinen xakean, eta zeintzuk izan dira zure garaipen garrantzitsuenak?

OHOko hirugarren mailan hasi nintzen. Amak anaia bikia eta biok apuntatu gintuen judoan eta xakean. Torneoei buruz, oroitzapen onena utzi didatenak honakoak izan dira: 18 urtez azpiko Espainiako Txapelketa, bigarren izan nintzelako; Iruñea Hiria torneo irekia, beti emaitza onak lortu ditudalako; Bosgarren Arrasate Hiria, irabazi dudan erritmo normaleko lehen torneo irekia delako, bakarra da ere; Puente Foral Nazioarteko Lehen torneoa, nire lehen nazioarteko maisuko norma lortu nuelako.

Profesionalki xakera ez dedikatzea aukeratu duzu. Sekula ez duzu zalantzarik izan?

Ez da gutxiagorik ere. Beti garbi izan dut xakea nire zaletasuna izan behar dela. Pozik nago egin dudan bidearekin. Telekomunikazio Ingeniaritza ikasi dut, eta orain doktoregoarekin nabil, xakea bazter batean utzi barik.

Orain xakeari eskaintzen diozun denborarekin nazioarteko maisuko titulua lor dezakezula pentsatzen duzu?

Posible ikusten dut. Bi torneo on egin ditzaket, eta falta zaizkidan normak egin. Baina ez diot horrelako helbururik ezarri neure buruari. Betiko moduan jokatuko dut, hau da, ez asko eta bakarrik oporretan. Hori bai, jokatzen dudan torneo bakoitzean ahal dudan guztia egiten dut beti. Nire helburua ondo jokatzea eta nire jokoaz gozatzea izango da beti.

Zeintzuk izango dira zure hurrengo torneoak?

Cartagenan maiatzean jokatuko den Espainiako Unibertsitate Arteko Txapelketa. Gero, uztailean, beti jokatzen dudan Andorrako Irekia. Udan atzerrian ireki bat jokatzea gustatuko litzaidake, seguraski Danimarkan edo Txekian. Horrez gain, nire taldearekin, Oberenarekin, Espainiako Ohorezko Mailara igotzen saiatuko gara.

Euskal Ligan Ohorezko Mailatik jaitsi zarete. Zer gertatu zaizue?

Gogorra da Ohorezko Mailan mantentzea, eta talde onena ezin izan dugu osatu txanda askotan.

Ligan baten bat Nafarroako taldeak Euskal Ligan egotearen kontra agertu da. Nafar gisa zuk zer iritzi duzu?

Euskal Ligak partida gogorrak jokatzeko aukera ematen digu. Nafarroan bakarrik jokatuz gero, ez genuke aukera hori izango. Ondo ikusten dut torneotan ahal den jokalari onenak jokatzea. Ona da denontzat.

Euskadiko selekzioarekin jokatzea gustatuko litzaizuke?

Noski baietz. Behin jokatu nuen, Portugalen kontra, eta oso gaizki egin nuen. Nire irudia konpontzea gustatuko litzaidake.