berria.info

Asteazkena, 2007ko ekainak 6.

Euskal selekzioaren ofizialtasuna aldarrikatuko du ESAITek igande honetan Leitzan.

Festa eta aldarrikapena uztartuta, Euskal Selekzioaren Aldeko Eguna egingo dute.

UNAI ZUBELDIA.

DonostiA.

ESAITek antolatuta iaz Zarautzen egin zuten Euskal Selekzioaren aldeko VIII. Eguna; aurtengoa Leitzan egingo dute. GORKA RUBIO/ARGAZKI PRESS.

«Jaia bai, baina aldarrikapena ere bai». Hitz horiekin definitu zuen atzo Itziar Arratibel ESAITeko lehendakariak datorren igandean Leitzan (Nafarroa) egingo duten Euskal Selekzioaren Aldeko Eguna. «Aurten ere egun osoko jaia eta aldarrikapen eguna izateko asmoarekin antolatu dugu». Euskal selekzioaren ofizialtasuna aldarrikatzeko jaio zen ESAIT orain 11 urte. «Ordutik, denetik egin dugu. Hala ere, ez da nahikoa izan, oraindik herri honek ofizialki ez duelako nazioarteko txapelketa ofizialetan parte hartzeko aukerarik, eta herri honek oraindik ez duelako lurralde zatiketaren gainetik federazio nazionalik sortu».

Aurtengoa ESAITek jarraian antolatzen duen euskal selekzioaren aldeko bederatzigarren eguna izango da. Lehenengoa 1999an antolatu zuten, Oiartzunen. Ordutik, Bilbon, Tolosan, Arbizun, Senperen, Agurainen, Algortan eta Zarautzen antolatu dituzte egunok.

Orain arte bezala, ESAITek aurrerantzean ere lanean jarraitzeko asmoa dauka. «Hori da helburuak lortzeko egin dezakegun apusturik onena eta zuzenena. Ekin eta ekin, elkarrekin aurrera egin. Filosofia horrekin aritu gara orain arte lanean, eta aurrerantzean ere horrela arituko gara». Etsipena alde batera uzteko eskatu zuen Arratibelek atzo. «Lanean jarraitzeko garaia da. Hel diezaiogun erronkari, egin dezagun bakoitzak gure aldetik ofizialtasuna lortzeko eta Euskal Herriko federazio nazionalak sortzeko egin dezakeguna, horrela lortuko baitugu aldarrikatzen ari garena, lana eginda lortuko baitugu herri honek nahi duena».

############

EGITarauA.

10:30. Ikurrinaren igoera.

11:00. Ekitaldia.

11:30. Haurrentzako puzgarriak (egun guztian) eta herri kirolak; Leitza, Idiazabal, Oiartzun eta Sarako herrien arteko lehia.

12:30. Xakea, partida azkarra, Mikel Zubiaren aurka, parte-hartze irekia.

13:00. Pilota partidak.

14:30. Herri bazkaria: zikiro jatea.

16:30. Zakurren erakustaldia.

17:30. Leitzako pilota eskolako pilotarien partidak.

19:00. Jaialdia amaitzeko musika.

Egun guztian. Batukada taldea herrian zehar.

############