Astelehena, 2007ko ekainaren 11n.

Euskal Selekzioaren aldeko eguna, Leitzan.

euskal herriko federazio ofizialaren aldeko aldarrikapen ugari izan zen festan.

Selekzioaren aldeko iritzi taldeak, Udalbiltzak eta Leitzako Udalak bultzatu zuten atzoko jaialdi jendetsua.

elene arrazola.

Euskal selekzioaren bandera, Nafarroako bandera eta ikurrinari aurreskua eskaini zieten dantzariek. argazkia: e. a. s.

leitza. Atzokoa Euskal Selekzioaren aldeko bederatzigarren edizioa izan zen. Goiz goizetik hasita, Euskal Herri osotik etorritako ehunka lagun bildu ziren Leitzako plazan federazioaren ofizialtasunaren aldeko ekintzetan parte hartzen. Jaialdia ESAIT edota Euskal Selekzioaren aldeko iritzi taldeak, Udalbiltzak eta Leitzako Udalak antolatu zuten "Ekin eta ekin elkarrekin aurrera egin" lemapean eta arrakasta handia izan zuen deialdiak. Izan ere, euria eta lainoak izan ziren eguneko protagonistak, baina, hala ere, jende ugari inguratu zen plazara.

Iturengo joaldunek eman zioten hasiera ospakizunari 11.00ak aldean eta ondoren Leitzako bi dantzari gazteei eman zieten erreleboa. Hauek momentu hunkigarri bat protagonizatu zuten Euskal Selekzioaren bandera, Nafarroako bandera eta ikurrina eusten zituzten lau gaztetxoei aurreskua dantzatu zietenean. Txalo ugari izan zen amaieran eta segidan, hitza hartu zuten antolatzaileen bozaramaileek.

ESAITeko lehendakaria den Itziar Arratibel izan zen lehena eta selekzioaren garrantziaz mintzatu zen bere hizketaldian. Arratibelek herriaren nahia aurrera aterako dela aurreratu zuen. "Euskal Selekzio ofiziala lortuko dugu noiz hala noiz, gizartearen desioa da eta horren aurka ezin da ezer ere egin", adierazi zuen. Leitzako hauteskundetan garailea izan den Jabier Zabalo izan zen hurrengoa eta Leitzako Udalak helburu beraren atzetik jarraitu duela aurreratu zuen. Gainera, selekzioaren alde lan egiten ari diren lagunen aldeko txaloak eskatu zituen. Azkenik, Udalbiltzako kirol arduraduna den Joan Manuel Erasunek hartu zuen hitza eta honek "munduan zehar gure nazioa selekzioaren bidez zabalduko dugula" esan zuen.

ekitaldiz jositako eguna. Luzea izan zen atzoko jaialdia. Izan ere, aukera guzietako ekitaldiez gozatu ahal izan zuten bertara inguratu zirenek. Eguerdi aldean, esate baterako, herri kirol saioa izan zen plazan eta bertan Gipuzkoa, Nafarroa eta Lapurditik etorritako hogeiren bat gazte lehiatu ziren trontzak mozten, txingak garraiatzen eta lokotxak biltzen. Bien bitartean, txalaparta jotzaileak, txistulariak, trikitilariak, talogileak eta bertsolariak izan ziren kaleko giroa alaitzearen arduradunak. Ondoren, gainera, xake eta pala partiduak izan ziren herriko plazan. Nahi izan zuten guziek, gainera, Mikel Zubia xake jokalariaren aurka aritu ahal izan zuten. 14.30ak aldean, berriz, bazkari herrikoia izan zen eta bertan zikiro jatea egin zuten bildu ziren lagunek.

Arratsalderako ere antolatu ziren hamaika ekitaldi. Txakur erakusketa, pilota partiduak, musika eta umeentzako puzgarriak izan ziren, besteak beste.