ORVINA GARAILE, ADIN EZBERDINETAKO ARRANO ELKARTEKO III. XAKE TXAPELKETAN, HIRUGARREN ALDIZ.

Ez da makala Orvina taldearen marka. Hiru aldiz jokatu da Txapelketa hau eta hiruretan trofeo nagusia etxera eraman du.

Sei taldek parte hartu dute 2007.go ekainaren 23an, Arrano Elkartearen egoitzan, jokatutako Xake Txapelketa honetan: Gros A, Gros B, Gazte Berriak, Orvina, Amaiur Ikastola eta Maristas. 25 minutuko partidak izan dira.

Neurketa bakoitza 4 taulatan jokatu da. Lehenengo taulakoak 16 urtez azpiko jokalariak izan behar zuen; bigarren taulakoak, 14 urtez azpikoa; hirugarren taulakoak, 12 urtez azpikoa; laugarren taulakoak, 10 urtez azpikoa. Taula bakoitzean adin horretako ordezko jokalariek ere parte har zezaketen.

Orvinaren garaipena bideratuta zegoen hiru jardunaldiren ondoren. Lau puntuko abantaila zeramakion Amaiur Ikastolari. Hala ere, bien arteko norgehiagokan sufritzea tokatu zaio: 3-0 galtzen joan eta lehenengo taulan posizio zaila. Azkenean Amaiurko Bordat Arrizibitak huts egin du bukaeran eta Jon Iturraldek lortu du puntu garrantzitsua Orvinarentzat. Azkeneko jardunaldian lehenengo postuari eutsi dio, abantailako beste puntu erdia Amaiurrek jan dion arren.

Gros A Euskal Herriko talde mitikoak parte hartu du Txapelketa honetan. Bi talderekin, gainera. Donostiarrek hirugarren postua eskuratu dute A taldearekin. Orvinaren aurka 4-0 galdu du bigarren neurketan eta nahiko egin du hirugarren postua lortuta. Amaiurrekin bina berdindu du.

Hiru talde horiek trofeoa erdietsi dute. Gazte Berriak izan da laugarren, Gros B bosgarren eta Maristas seigarren.

Hauek izan dira jokalaririk onenak: Orvinako Jon Iturralde (4 partidatik 3 puntu), Adrián Ortega (3tik 2’5), Jonathan Chamorro (3tik 2), Luis David Jiménez Almeida (5etik 4) eta Mikel Ortega (5etik 4); Amaiurko Julen Flores (3tik 2), Olast Arrizibita (3tik 3), Aimar Yeregi (2tik 2) eta Aitor Flores (5etik 4); Gros A taldeko Iñaki Elduayen (5etik 4) eta Jon Jauregi (5etik 4); Maristasko Pablo Urriza (5etik 3’5).

Azken orduan, Baiona eta Mikel Gurea taldeek parte hartzeari uko egin badiote ere, Txapelketa ederra atera da. Momentuz, Orvinak nagusitasuna mantendu du Txapelketa honetan.

2006-06-23.

ARRANO ELKARTEKO XAKE TALDEA.

Ordezkaria: JOSEBA OTANO VILLANUEVA. Euskal Naziotasun Aitormena: S6973074A. Helbidea: Antsoaingo errepidea, 13 – 3 ezkerra (Iruñea).