Ostirala, 2007ko ekainak 29.

ZuzenDarIaRI.

Orvina garaile, adin ezberdinetako Arrano Elkarteko III. Xake txapelketan.

Ez da makala Orvina taldearen marka. Hiru aldiz jokatu da Txapelketa hau eta hiruretan trofeo nagusia etxera eraman du.

Sei taldek parte hartu dute 2007ko ekainaren 23an, Arrano Elkartearen egoitzan jokatutako Xake Txapelketa honetan: Gros A, Gros B, Gazte Berriak, Orvina, Amaiur Ikastola eta Maristas. 25 minutuko partidak izan dira.

Neurketa bakoitza 4 taulatan jokatu da. Lehenengo taulakoak 16 urtez azpiko jokalariak izan behar zuen; bigarren taulakoak, 14 urtez azpikoa; hirugarren taulakoak, 12 urtez azpikoa; laugarren taulakoak, 10 urtez azpikoa. Taula bakoitzean adin horretako ordezko jokalariek ere parte har zezaketen.

Orvinaren garaipena bideratuta zegoen hiru jardunaldiren ondoren. Lau puntuko abantaila zeramakion Amaiur Ikastolari. Hala ere, bien arteko norgehiagokan sufritzea tokatu zitzaion: 3-0 galtzen joan eta lehenengo taulan posizio zaila. Azkenean Amaiurko Bordat Arrizibitak huts egin zuen bukaeran eta Jon Iturraldek lortu zuen puntu garrantzitsua Orvinarentzat. Azkeneko jardunaldian lehenengo postuari eutsi zion, abantailako beste puntu erdia Amaiurrek jan zion arren.

Gros A Euskal Herriko talde mitikoak parte hartu du Txapelketa honetan. Bi talderekin, gainera. Donostiarrek hirugarren postua eskuratu dute A taldearekin. Orvinaren aurka 4-0 galdu zuen bigarren neurketan, eta nahiko egin zuen hirugarren postua lortuta. Amaiurrekin bina berdindu zuen.

Hiru talde horiek trofeoa erdietsi dute. Gazte Berriak izan da laugarren, Gros B bosgarren eta Maristas seigarren.

Hauek izan dira jokalaririk onenak: Orvinako Jon Iturralde (4 partidatik 3 puntu), Adrian Ortega (3tik 2'5), Jonathan Chamorro (3tik 2), Luis David Jimenez Almeida (5etik 4) eta Mikel Ortega (5etik 4); Amaiurko Julen Flores (3tik 2), Olast Arrizibita (3tik 3), Aimar Yeregi (2tik 2) eta Aitor Flores (5etik 4); Gros A taldeko Iñaki Elduaien (5etik 4) eta Jon Jauregi (5etik 4); Maristasko Pablo Urriza (5etik 3'5).

Azken orduan, Baiona eta Mikel Gurea taldeek parte hartzeari uko egin bazioten ere, Txapelketa ederra atera da. Oraingoz, Orvinak nagusitasunari eutsi dio Txapelketa honetan.

Joseba Otano. Arrano Elkarteko Xake Taldeko ordezkaria (Iruñea).

© berria.info