Asteartea, 2007ko uztailak 10.

19 euskal federazioren aurka helegiteak jarriko ditu Espainiako Gobernuak.

Federazio horien estatutuek euskal kirola nazioartean ordezkatzeko aukera eman dezaketela argudiatu du.

ERREDAKZIOA.

DonostiA.

Euskal selekzioko jokalariak, ofizialtasunaren aldeko pankartarekin, ekainean Venezuelan jokatutako partidan. Futbol federazioa ez dago zerrendan. CHICO SANCHEZ/EFE.

Espainiako Gobernuaren EAEko ordezkari Paulino Luesmak jakinarazi zuen atzo 19 euskal federazioren estatuen kontra helegiteak jarriko dituztela EAEko Justizia Auzitegi Nagusian. Estatuaren abokatuaren zeregina izango da 19 helegite horiek jartzea, estatutu horiek Arabako, Bizkaiko eta Gipuzkoako ordezkaritza gainditu eta «euskal kirola nazioartean ordezkatzea ahalbidetu dezaketelako». Eusko Jaurlaritzak duela hilabete gutxi onartu zuen federazio horien estatutuak moldatu eta eguneratzea, eta moldaketa eta eguneratze horien kontra jarriko ditu helegiteak Espainiako Gobernuak.

Paulino Luesmaren iritziz, EAEko Kirolaren Legean dute oinarria 19 federazio horien estatutuek. Kirolaren Legearen kontra ere helegitea jarri zuen bere garaian Espainiako Gobernuak, Auzitegi Konstituzionalean, «euskal kirolari estatuko eta nazioarteko ordezkaritza eman nahi ziolako». Espainiako Gobernuaren iritziz, Espainiako Konstituzioko 149-1-3 artikulua urratzen du EAEko Kirolaren Legeak, «Estatuarena baita nazioarteko harremanen eskuduntza». Gainera, Espainiako Gobernuak EAEn duen ordezkariak bere komunikatuan jakinarazi duenez, Auzitegi Konstituzionalak baliorik gabe utzi zuen bere garaian Euskal Kirolaren 16.6 artikulua, euskal federazioen ordezkaritzari zegokiona, eta ordezkaritza hori norbere lurraldera bakarrik mugatu zuen.

Orain, aipatutako estatutuetan Kirolaren Legeak jasotzen zituenen antzeko artikuluak jasotzen direlako eta Espainiako kirolaren araudiaren kontrakoak direlako erabaki du Espainiako Gobernuak federazi horien guztien kontra egitea.

EKFB-REN GAITZESPENA. Euskal Kirol Federazioen Batasunak (EKFB) Espainiako Gobernuak hartutako erabakia gaitzetsi du, «erabat politizatua eta testuinguruz kanpokoa» dela nabarmenduz. Ulertezina egin zaio EKFBri Paulino Luesmak iragarritakoa, eta Eusko Jaurlaritzako Kirol Zuzendaritzak egindako lan bikaina zapuztea leporatu dio. «Euskal federazioen eskubideak eta lana defendatu nahi ditugu. Espainiako Gobernuak federazioen egituran muturra sartzeari utzi behar dio, daukagun legediaren barruan ari baita lanean», nabarmendu du Euskal Kirol Federazioen Batasunak gaztelera hutsez idatzitako ohar batean.

EKFBren iritziz, gainera, federazio horien estatutuek ez dute Espainiako Konstituzioaren artikulurik urratzen, «nazioarteko kirolak ez diolako Nazioarteko Harre- manen eskuduntzari heltzen, federazioen arteko kirol harremanei baizik, eta ez direlako estatuak nazioarteko lehiaketetan parte hartzen dutenak, kirol federazioak baizik».

Eusko Jaurlaritzako Kirol Zuzendaritzak gaur emango du Espainiako Gobernuak iragarritako neurriaren inguruko iritzia, eta Euskal Selekzioen Aldeko Iritzi Taldeak ere bai.

############

19 federazioaK.

Txirrindularitzakoa.

Karatekoa.

Kirol egokitukoa.

Eskubaloikoa.

Herri kiroletakoa.

Atletismokoa.

Igeriketakoa.

Sanbo eta borrokakoa.

Halterofiliakoa.

Gimnastikakoa.

Surfekoa.

Zaldiketakoa.

Triatloikoa.

Automobilismokoa.

Errugbikoa.

Judokoa.

Xakekoa.

Ur kiroletakoa.

Olinpiar tirokoa.

############

© berria.info