Asteazkena, 2007ko uztailak 18.

«Euskal Herrian xakeak gero eta zale gehiago eta kalitate hobea du».

ROBERTO CIFUENTES Gros Xake Taldeko jokalaria eta entrenatzailea.

Ohorezko Mailako Lauko Finalean ariko da aurten Gros lehen aldiz. Cifuentes entrenatzaile eta jokalariaren jarduna erabakigarria izan da. Loreak ditu denentzat.

josu tornaY.

DonostiA.

MONTSERRAT T. DIEZ/EFE.

Txileko Santiago hiriburuan hasi zen piezak mugitzen 9 urte zituela. 13 zituela hasi zen sistematikoki eskolak jasotzen, eta 50 ditu orain. Gros Xake Taldeko entrenatzaile eta izarra da.

Noiz erabaki zenuen Txiletik irtetea eta Europara etortzea?

Maisu Handiaren titulua lortzera Europara etortzeko ilusioa beti izan nuen. Txilen titulu hori lortzea zaila zen, maila handiko torneorik ez zegoelako. 1990ean Herbehereetara joan nintzen bizitzera, eta 10 urte egin nituen han.

Noiztik bizi zara xaketik?

21 urte neuzkanean erabaki nuen. Garai hartan, unibertsitatean ikasten ari nintzen, baina Txileko Federazioak lan eskaintza bat egin zidan: kirol talentuen eskola bateko entrenatzailea izatea. Eta ezin nuen ezetzik esan. Nire bizitza profesionala hor aldatu zen.

Xakean garatu dituzun alorretan -jokalaria, irakaslea, entrenatzailea-, zein gustatzen zaizu gehien?

Niri xakea gustatzen zait. Aipatu dituzunak xakea adierazteko erak dira.

Badaramatzazu urteak Euskal Herrian torneoak jokatzen. Zein maila eta zaletasuna dago, zure ustez?

Urtero daude torneo eta ekintza berriak. Taldekako torneoak gero eta lehiatuagoak dira, eta hori seinale ona da. Euskal Herrian xakeak gero eta zale gehiago eta kalitate hobea du.

Urteak daramatzazu Grosekin harremanetan. Jokalari eta entrenatzaile moduan, umeak, gazteak eta talde profesionala ere eramaten duzu. Zelan hasi zinen Donostiako taldearekin?

Grosekin fitxatu baino lehenago izan nuen Donostiako jokalariekin harremana. Beste alde batetik, Donostia da Europan gehien gustatzen zaidan hirietako bat. Gainera, sarritan parte hartzen nuen Donostiako Nazioarteko Irekian eta harremana nuen klubeko zuzendaritzarekin. Eta dena erraztu zen Huescara bizitzera joan nintzenean, 2000. urtean hango neska batekin ezkondu ostean.

Gros Xake Taldea orain dela gutxi arte auzoko kluba zen, eta gaur egun Europako onenetariko bat da. Zein izan da, zure ustez, aldaketa horren oinarria?

Garbi dago xakeko nazioarteko figura nagusiak kontratatzea izan dela gakoa. Horrek ekarri ditu kirol lorpenak, eta lagungarria izan da xakea klubeko harrobian zabaltzeko garaian. Esan behar da, alde horretatik, Eliseo Argandoña klubeko zuzendariaren lana funtsezkoa izan dela.

Klubaren garapena jasangarria dela, eta jarraipena izango duela uste duzu?

Horiek dira klubaren planak, eta orain arte erakutsitako esfortzua eta gogoa ikusita, ezin dugu zalantzarik izan.

Groseko lehen taldeak Euskal Herritik kanpora jokatzen duenean jokalari kanpotar askorekin aritzen da. Jokalari horien ekarpena torneo garrantzitsuetara mugatzen da edo klubeko harrobiarekin lotutako beste ekintza batzuetan ere hartzen dute parte?

Gure kluba liderra da, hainbat kategoriatan, EAEn eta Espainian. Horrek erakusten du esfortzu teknikoa maila guztietara ailegatzen dela. Eta, horretarako, nazioarteko figura horien ekarpena ere badaukagu.

Epe ertainera, posible izango al da Europako Txapelketa batean Gros taldea euskal jokalari gehiagorekin ikustea, taulen erdiarekin adibidez?

Garbi dago klubeko zuzendaritzak nahiago lukeela harrobiko jokalariak taula gehienetan egotea. Baina, nire ustez, kirol emaitzak ez lirateke hain asegarriak izango, batez ere gure aurkariak ere kanpoko jokalariekin jokatzen dutelako.

Zelan baloratzen duzu taldearen jokaera, batez ere euskal jokalariena, Lugoko sailkatzeko fasean?

Denak jokaera ona erakutsi dute eta Lauko Finalerako sailkatzea horren froga da. Iñigo Argandoñak eta Santi Gonzalezek itxarobideak bete dituzte. Kontuan izan behar da profesionalak ez diren taldeko bakarrak direla.

Lauko Finalerako zein helburu duzue?

Irabaztea da helburua. Gu ez gara kirol honetako turistak.

Azkenean, Europako txapelketa jokatuko duzue aurten?

Hori ere gure asmoetako bat da.

Zelan ikusten duzu nazioarteko xakearen egoera? Munduko tituluaren banaketa, tranpak egitearen salaketak, Topalovek titulurako fase berrian parte ez hartzea?

Ez daukat iritzirik, jokabide horien egia ez dudalako ezagutzen. Baina garbi eduki behar da xakean gezurrari epe luzean ezin zaiola eutsi.

Internet eta espezializatutako programekin zelan aldatzen ari da xakea?

Orokorrean, Internet laguntza garrantzitsua bihurtu da xakea zabaltzeko edozein tokitara. Etxetik partidak eta torneoak joka eta ikus ditzakezu. Beti izango duzu lagun bat jokatzeko edo partida bat aztertzeko, edozein ordutan eta edozein tokitan.