Larunbata, 2007ko abuztuak 4.

ESAITen mendi martxa gaur amaituko da, Gernikan.

erredakzioA.

ESAIT Euskal Selekzioaren Aldeko Iritzi Taldeak Kalean nahiz mendian erabili EHNA leloarekin egin du aurtengo mendi martxa. Zazpigarren mendi martxa hori orain dela zortzi egun hasi zen, Bastidan. Gaur amaituko da, Gernika-Lumon, eta azken egunerako ekitaldi ugari antolatu dituzte ESAITekoek.

Mungiatik 08:00etan irtenda, 13:30ak ingururako Gernikan izango dira ibiltariak. Gernikan azoka eguna dela aprobetxatuz, txokoak ezagutzeko ibilaldi modukoa egingo dute herrian. Udaletxeko kideek harrera ekitaldia egin eta ESAIT plataformakoek euren balorazioak egin ostean, mendi martxan parte hartu dutenek bazkaria eta erromeria egingo dute herriko plazan.

Aurtengo mendi martxak zortzi etapa izan ditu. Atzo, Portugaletetik Mungiarako ibilbidea egin zuten. Mungian egindako harrera ekitaldian herriko kirolariek, musikariek zein politikariek hartu zuten parte. Mungiako Udaleko ordezkariek (EA, EAE-ANV eta EB) euren aldarrikapenarekin bat egin izana eskertu dute ESAITekoek.

© berria.info