Igandea, 2007ko abuztuak 5.

Ametserako bidea eginez

ESAITen mendi martxa atzo amaitu zen, Gernikan. Antolatzaileak pozik daude emaitzarekin, baina selekzioaren alde lanean jarraitu beharra dagoela nabarmendu dute.

KARMELE GARMENDIA.

Zortzi eguneko ibilaldiaren ostean, botak eranzteko gogoz zegoen bat baino gehiago. MARISOL RAMIREZ/ARGAZKI PRESS.

Mendi martxako kideek harrera beroa jaso zuten Gernikan. Adin guztietako jendea joan da martxan. MARISOL RAMIREZ/ARGAZKI PRESS.

Zortzi eguneko ibilaldiaren ondoren, atzo amaitu zen ESAITek Euskal Selekzioaren Aldeko Iritzi Taldeak urtero antolatu ohi duen mendi martxa. Aurreko larunbatean irten zuten, Balmasedatik, Gernika helmugatzat harturik. Hala, atzo eguerdirako 150 bat ibiltari gerturatu ziren Gernikara. Jose Mari Gorroño Gernikako alkateak ESAITen lana goraipatu nahi izan zuen. Euskal selekzioaren alde 12 urtez egindako ekarpenak izan zituen hizpide, eta «amets» horren bila jarraitu beharra dagoela nabarmendu zuen.Herriko plazara bazkaltzera joan aurretik, balorazioak egiteko tartea hartu zuen ESAITek harrera ekitaldian.

Txiki Falero ESAITeko kideak hartu zuen hitza. Kalean eta mendian erabili EHNA aurtengo mendi martxaren leloarekin bat eginez, euskal agiria izatearen garrantzia azpimarratu zuen, eta baita Euskal Federazio nazional bat sortzeko beharra ere. Dagoeneko lortu diren helburu batzuk ere aipatu zituen. Esaterako, egun, EHNArekin Mendi Federazioko txartela tramitatzeko aukera dago. Bide horretan aurrera egiten jarraitu beharra dagoela azpimarratu zuen Falerok, baina urteko egun guztietan.

Mendi martxak oro har izandako harrera beroa ere izan zuen gogoan Falerok. Herrietan egindako egonaldietan udalek, gizarte eragileek zein herritarrek emandako laguntza eskertu zuen. Politikariei dagokienez, PP eta PSE-EEk salbu, gainontzeko alderdiek plataformaren aldarrikapenarekin bat egin izana eskertu zuen Falerok. Beste arlo askotan erakutsi ez duten adostasuna nabarmendu nahi izan zuen. Bestalde, zazpi urtean arazorik izan ez duten arren, aurten Portugaleten PSE-EEko Udalak jarritako eragozpenak aipatu zituen Falerok. Izan ere, herri horretako Udalak ez zien kiroldegian lo egiten utzi.

Hala ere, oztopoak oztopo, zazpigarren mendi martxa horrekin oso pozik agertu ziren ESAITeko kideak. Kopuruari begira, Gernikan 150 pertsona inguru azaldu arren, mendi martxa guztiaren atzean jende mordoa dagoela azaldu zuen ESAITeko kideak eta gero eta jende gehiago ari dela gerturatzen. Falerok mendi martxak babes handia duela azaldu zuen eta «osasuntsu» dagoela.

© berria.info