Igandea, 2007ko abuztuak 12.

”Profesionala izan nahi dut, horrek Iruñetik joatea ekarriko badu ere”.

MIKEL HUERGA, xake jokalaria. Espainiako 18 urtez azpiko txapelduna.

Mikel Huergak asko ondu du bere jarduera azken bi urteetan. FIDE maisu titulua eskuratu du azken sasoian, eta 2.400 elo puntuko langa gainditu du, eta Nazioarteko Maisu titulua ere azkar lortuko duela espero da.

JOSU TORNAY.

donostia.

Espainiako 18 urtez azpikoen txapela Iruñera ekarri ostean, Europako gazteena du orain buruan Mikel Huerga nafarrak (Iruñea, 17 urte). Irailean jokatuko da txapelketa hori, eta hara abiatu aurretik hartu du tartetxoa BERRIA-ri elkarrizketa eskaintzeko.

Urte batzuk saiatu ostean lortu duzu Espainiako txapelketa irabaztea. Zein izan da aldea beste urte batzuekin konparatuta?

14 urte azpikoan hasi nintzen Espainiako txapelketa jokatzen, baina aurten denboraldi osoa eman dut buruan xakea bakarrik nuela, ilusioa, lana eta esfortzuarekin. Ezberdintasuna, hauxe, agian. Ez dut uste nire aurkariek nik adina lan egin dutenik aurten.

Euskadiko txapelketan jarrera ona erakutsi zenuen, nahiz eta azken partida galdu. Jarrera horrek, Espainiako 18 urtez azpiko txapelketari begira, konfiantza handiagoa eman al zizun?

Ez nintzen pozik geratu. Iaz baino atzerago geratu nintzen, eta azken txandan galtzeak beti oroitzapen txarra lagatzen dizu. Konfiantza ez, esperientzia irabazi nuen.

Espainiakoan Xabier Vilarekin galdu ostean, torneoa irabazteko aukera bazenuela uste al zenuen?

Ez, batere ez. Vilarekin galdu ostean utopia bezala ikusten nuen nagusitzea. Pentsatu nuen nire helburua partida onak egitea eta eloa igotzea izan behar zela. Ezusteko itzela izan zen niretzat, hirugarren partidaren ondoren txapelketa irabaztea nire eskutan zegoela jabetzea.

Zein izan zen torneoko partidarik gogorrena?

Xakea bakarrik aztertzen badugu, Vilarena oso ona izan zen. Oso ondo jokatu zuen berak, bereziki partida bukaera. Baina urteak pasa eta beti gogoratuko dudan partida azkena izango da. Llorenterekin jokatutako partidak torneoa erabakitzen zuen. Gainera, partida zaila eta gogorra izan zen. Biok irabaztera jokatu beharra geneukan. Goizeko 9etan hasi ginen, eta 13:15ean bukatu. Azken minutuetan denbora aldetik estututa lortu nuen irabaztea.

Ze aukera duzu irailean jokatuko den Europako txapelketan, Kroazian?

Europa mailan jokatuko dudan lehen torneoa da, eta ez dakit zehatz-mehatz zein maila egongo den. Partida onak egiten eta eloa igotzen saiatuko naiz. Emaitza ona litzateke 5 edo 10 onenen artean sailkatzea.

Prestakuntza bereziren bat egingo al duzu Europako txapelketarako?

Egia esan, ez. Denboraldi honetan lortzen ari naizen emaitza onek konfiantza eman didate.

Zelan hasi zinen xakean?

Sei urterekin hasi nintzen jokatzen, eta agudo piztu zen nigan jakin-mina. Nire aitak erakutsi zidan piezak mugitzen eta hortik gutxira klaseetara apuntatu nintzen.

Zein da zure alderik sendoena eta ahulena xakean?

Onena, konbinatzeko erraztasuna. Gainera, intuizio ona daukat. Askotan ez dut denborarik galtzen. Hala ere, lasaitasun falta hori arazo bat da gutxiegi pentsatzen dudanean. Nire alderik ahulena, aldiz, alor psikologikoa da. Partida asko galtzen ditut horregatik. Fede larregi izaten dut nigan, eta batzuetan subjektibotasun handiarekin baloratzen ditut posizioak. Horren ondorioz, erabaki txarrak hartzen ditut.

Zure bilakaera ikusgarria izan da, eta litekeena da laster 2.400 elo puntuak gainditzea. Zure helburua xakeko jokalari profesionala izatea al da?

Bai. Nire helburua xake jokalaria izatea da, baina ez bakarrik jokatzea, eskolak ematea ere bai. Nire ustez, hau da modu zuzenena xake profesionalean murgiltzeko. Aurten ikasketak utzi ditut, eta xakean entrenatzen, torneoak jokatzen eta eskolak ematen denbora asko eman dut.

Nafarroan duzun aukerarekin, posible al da benetan profesionalki jardutea?

Nafarroan baliabideak oso txarrak dira. Gainera, eskaera gutxi dago. Erabakia hartu nuenetik banekien noizbait Iruñetik mugitu beharko nuela. Oraingoz Batzelonara joatea pentsatzen ari naiz. Hango klub batean jokatzeko eskaintza egin didate datorren denboraldirako.

Diru laguntzaren bat jasotzen al duzu?

Instituzioen aldetik ezer ez.

Posible ikusten al duzu Lau Nazioko torneoan aurten Euskadiko selekzioarekin jokatzea?

Badaramat denbora apur batean horrelako zerbaiten zain, baina orain arte ez naute deitu. Gustatuko litzaidake jokatzeko gonbidapena jasotzea eta jaso ezkero, ziur aski parte hartuko nuke.

Ohorezko Mailatik jaitsi zen zure taldea, Oberena. 2008ko Euskal Ligarako berriz igotzeko moduko taldea osatzea lortuko duzuela uste al duzu?

Oberenan jokalari asko dago. Aurten ezin izan dugu jokalari onenekin jokatu. 2008an helburua berriz igotzea izango da, baina ez dakit ze jokalari izango ditugun.

© berria.info