JUAN JESUS MINDEGIA ARRANO ELKARTEKO TXAPELKETAKO GARAILE, NAGUSITASUN HANDIZ.

Arrano Elkarteko X. Xake Txapelketa 2007.go irailaren 10etik 14ra jokatu da. Beti bezala, xakelari euskaldunei eskainitako Txapelketa izan da. Hau da, euskaraz hitz egiten dakiten jokalariei. 5 jardunaldiko Txapelketa izan da, lau orduko partidekin. Nafarroako eta Euskal ELOrako baliagarria da Torneo hau.

Edizio honetan, 27 jokalarik eman dute izena (iaz baino 6 gehiago). Hau izan da ediziorik jendetsuena, Txapelketa sendotu den seinale.

Parte hartutako jokalariei dagokienez, aniztasuna agerikoa izan da. Hamar taldetako jokalariak aritu dira: Arrano Elkartetik, 11; Amaiurretik, 3; Mikel Gureatik, 3; Orvinatik, 3; Zaldi Beltzatik, 2; Alaitz taldetik, 1; Berriozarretik, 1; Gazte Berriak taldetik, 1; San Juanetik, 1; Zizur-Ardoi taldetik, 1.

Faboritoei dagokionez, bi jokalari nabarmentzen ziren: Juan Jesús Mindegia eta David Arjol. Maila apalago batean, beste bi: Iker Irañeta eta Joseba Otano.

Mindegiak pronostikoak bete ditu. Nahiko erraz menperatu ditu aurkari guztiak, nahiz eta denak oso ezagunak izan Nafarroako xakean: Manex Insausti, Javier Sevilla, Iker Irañeta, Mikel Razkin eta Joseba Otano.

Okerrago izan da David Arjolen ibilbidea. Ustekabean, hirugarren partida galdu zuen Mikel Razkin bere taldekidearen aurka. Hor utzi zuen Txapelketa.

Iker Irañetak oso Torneo txukuna burutu du. Mindegiaren aurka galdu zuen, baina Klemente Zelestino, Aitor Martínez, Igor Dominguez eta Javier Sevilla gainditu ditu. Bigarren postua eskuratu du.

Joseba Otano, aurreko txapelduna, ez da iaz bezain fin ibili. Bigarren partida galdu zuen San Juan taldeko Daniel Pérez Alonsoren aurka. Laugarren partida ozta-ozta irabazi zion Iñaki Arrizibitari, galduta ibili ondoren. Azkenean, Torneoa konpontzerik ez du izan, Mindegia ahalguztidunaren aurka eta zazpigarren geratu da, 3 puntuz.

Mikel Torres hirugarren sailkatu da, 4 puntuz. Torneoa galdu gabe bukatu du. Mikel Razkin laugarren izan da, 3’5 puntuz, Arjolen aurka Txapelketa irauli ondoren. Bosgarren Iñigo Saenz izan da, 3’5 puntuz. Honek ere galdu gabe amaitu du Txapelketa.

Seigarren, 3 puntuz, Javier Sevilla izan da. 14 urtez azpiko lehenengo jokalariarentzako trofeoa irabazi du. Hiru urtez, Manex Insaustik eraman du sari hau, baina aurten Berriozarko jokalaria indartsuago azaldu da.

Datorren urtean are eta lehiaketa hobea izatea espero dute antolatzaileek.

Iruñean, 2007.go irailaren 16an.

ARRANO ELKARTEA XAKE TALDEA.

Ordezkaria: JOSEBA OTANO VILLANUEVA. Euskal Naziotasunaren Aitormena: S6973074A. Helbidea: Antsoaingo errepidea, 13 – 3 ezkerra (Iruñea, Nafarroa). Posta Kodea: 31.014.