Asteartea, 2007ko urriak 2.
Anand munduko txapeldun
berria.
Oso parekatua
izan da Mexikon jokatu den Munduko Txapelketa, baina indiarra izan da onena.
josu tornaY.
DonostiA.
Larunbateko jardunaldiak
baieztatu zuen Viswanathan Anand
indiarraren garaipena, Mexikon jokatu den Munduko Xake Txapelketan. Peter Leko hungariarraren aurka
berdintzea nahikoa zuen txapelketa irabazteko. Hala ere, Lekok beltzekin
irekitze espainiarraren Marshall bariantea aukeratu
zuenean interesa piztu zen. Baina indiarrak ondo lehortu zuen posizioa eta
berdinketa sinatu zuten. Boris Gelfand
israeldarra ere saiatu zen, baina berdinketarekin konformatu behar izan zuen.
Bestalde, Vladimir
Kramnikek Levon Aronian armeniarrari irabazi zion. Azken partidetan
errusiarrak azeleragailua zapaldu du eta hiru partidetatik bat berdindu eta bi
irabazi ditu, baina Aleksander Morozevitxen
aurkako bederatzigarren txandako porrota gainditzeko ez da nahikoa izan.
Aurreikusten zen bezala,
berdintasuna izan da nagusi Mexikoko Munduko Txapelketan. Egungo goi mailako
xakean gakoa ez galtzea da, eta partidarik ez galtzea lortu duen bakarra Anand izan da. 14 partidetatik lau irabazi ditu eta hamar
berdindu. Partida batzuetan, Kramniken kontra
adibidez, indiarrak nahiko posizio txarrak izan ditu, baina zorrotz defendatu
ditu. Hor egon da gakoa. Garaipenarekin Anandek
2.848ko jokaera izan du torneoan.
############
SosLaIA.
Madrasko Tigrearen talentu naturala.
Viswanathan AnanD.
Xakeko munduko txapelduna.
Benetako izena Anand Viswanathan da, ez
alderantziz. Hala ere, akats batengatik gaizki erregistratu zen FIDEko zerrendetan, eta deitura gisa hartu zuten izena: Anand. Ekonomian lizentziaduna eta eleaniztuna da. Nahiz
eta Madrasko Tigrea goitizena gazte zela jaso, lasaia eta atsegina da
indiarra, kirolaria eta barazkijalea. Collado Villalban (Espainia) bizi da eta izaera umil eta lagunkoiak
begikotasuna eman dio. Sobietar Batasunean jaio ez den xake jokalari onena da Fischer erretiratu zenetik, Europa Ekialdeko nagusitasuna
apurtu zezakeen bakarra. Indian heroi nazionala da eta hainbatetan lortu du
Indiako kirolari onenaren saria. Egun elo
zerrendetako munduko lehena da eta hamar urte daramatza bost onenen artean.
Madrasen -India- jaio zen, 1969an.
Amak txikitan irakatsi zizkion xakeko arauak, eta hortik aurrera hobetzeko gogo
handia izan du. Madrasen xake giro handia zegoen garai hartan, gainera. Indiako
nazioarteko lehen bi maisuak -Aaron eta Rayikumar- Madraskoak ziren, eta han, Sobietar Batasuneko
enbaxadak sustatuta, Mijail Tahl
xake klub ospetsua zegoen. Ananden talentu naturala
partida bizkorretan ikusten zen batez ere. Lehen urteetan ohikoa zen haren
jokaldiak ia pentsatu barik erabakitzea. 21 urte zituenean, adibidez, munduko
bosgarrena zen Valeri Salovi
irabazi zion, hiru minutu soilik erabilita.
Anandek lehen arrakastak 1983tik
1985era lortu zituen. Indiako gazteentzako torneoak menderatzen zituen, eta
1986an Indiako txapeldun bihurtu zen. Hala ere, haren kirol ibilbideko momentu
erabakigarriena 1987an iritsi zen, munduko gazteentzako txapelketa irabazi
zuenean. Haren izena mundu osoan zabaldu zen, eta «demonioak bezain bizkor
mugitzen duen gaztetxo indiarra» izenarekin bataiatu zuen aurkari batek. Maisu
Handiko titulua 18 urterekin lortu zuen. Baina ezusteko ezatseginen bat ere
jaso zuen. 1988an, ia pentsatu barik, sei mugimendutan galdu zuen Alonso
Zapataren aurka: pentsaezina Maisu Handi batentzat. Ohitura batzuk aldatu
beharra zeuzkan gorago ailegatzeko.
MUNDUKO
TXAPELKETAREN BILA. Maisu Handiko titulua lortu
ostean, urte txar batzuk pasa zituen Anandek. 1991n
egoera hobean zen, eta Munduko Txapelketako hautagaien artean sartu zen. Karpov tokatu zitzaion final-laurdenetan, eta, nahiz eta
buruz buruko ona jokatu, galdu egin zuen. Hala ere, 1991ko Gabonetan baieztatu
zen handienen artean sartuko zela. Reggio Emilia
torneoan, 90eko hamarkadako lehen supertorneoan,
nagusitu zen, Karpov eta Kasparoven
aurretik.
Baina 1993an banaketa iritsi zen
xake mundura. Anand saiatu zen PCAko
eta FIDEko torneoetan jokatzen, eta bietan izan zen
Munduko Txapelketarako hautagaia. Agian larregi izan zen. FIDEkoan
Kamskik kanporatu zuen, eta PCAkoan
finalera heldu zen, Kasparovekin. 1995eko irailaren
11n, World Trade Center-eko 107. solairuan hasi zen finala. Anandek irabazi zuen, bederatzigarren partidan. Baina Kasparov une onean zegoen, eta hurrengo bost partidetatik
lau irabazita tituluari eutsi zion.
1998an beste aukera bat izan
zuen Anandek Munduko Txapelketa irabazteko. FIDEren egitura berria irabazi zuen, eta Karpoven aurka finala jokatzeko eskubidea lortu zuen.
Erritmo normaleko partidetan 3-3 geratu ziren, baina, paradoxikoki, berdinketa
hausteko partida bizkorretan Karpov nagusitu zen.
Karpovek eta Kasparovek
XX. mendeko azken 25 urteak menderatu zituzten, eta hori oztopo handia izan da
xake jokalarien belaunaldi oso batentzat. Munduko txapelketa irabazteko aukerak
zabaltzen hasi ziren XXI. mendea hurbildu ahala. Beraz, 2000n Kramnikek Kasparov gainditu zuen Braingames Munduko Txapelketan, eta Anandek
Xirov gainditu zuen FIDEkoan.
Momentu horretan bi munduko txapeldun zeuden, Kramnik
eta Anand. Kasparov,
berriz, elo zerrendetan zegoen, eta gehienen ustez
onena zen. Geroko historia ezaguna da: FIDEko KO
torneoak urteroko munduko txapeldunekin, San Luisko
torneoko Topaloven garaipena, Elistako
Topalov-Kramnik buruz burukoa eta Mexikoko Ananden garaipena. Orain munduko txapeldun bakarra da Anand, baina datorren urtean Kramniken
aurkako kitarakoa jokatzera behartuta dago. Norgehiagoka mota hori da Kramniken espezialitatea eta aukera ezin hobea da Anandentzat benetako txapelduna bera dela erakusteko.
JOSU TORNAY.
############
############
saILKaPenaK.
1. Viswanathan Anand 9 puntu.
2. Vladimir Kramnik
3. Boris Gelfand
4. Peter Leko
5. Peter Svidler
6. Aleksander Morozevitx
7. Levon Aronian
8. Aleksander Gristxuk
############
© berria.info