Asteazkena, 2007ko urriak 10.
Iazkoa hobetu ezinda.
Gros-Iretza 13.
postuan sailkatu da Europako Kluben arteko Xake Txapelketan, Turkian.
JOSU TORNAY.
DonostiA.
Alexander Morozevitx, irailean
Mexikon jokatutako Munduko Txapelketan. MARCOS DELGADO/EFE.
Hilaren 3an hasi eta atzo bukatu
zen Kemeren (Turkia) jokatutako Europako Kluben arteko Xake Txapelketan.
Orotara 56 talde aritu dira lehian. Torneoko faborito nagusiak talde
errusiarrak eta alemaniarrak baziren, goiko postuetan egoteko aukera pentsatzen
zena baino zabalagoa izan da. Azkenean, norgehiagoka guztiak jokatu ondoren,
Linex-Magic Merida Extremadurako (Espaina) taldeak irabazi du Europako
Txapelketa. Gros-Iretza, berriz, 13. postuan sailkatu da eta ezin izan du iazko
zazpigarren postua hobetu.
Linex-Magic Meridak norgehiagoka
zaila zuen azken txandan Saratov talde errusiarrarekin eta ondo irabazi zuten
(4-2). Espainarren porrot bakarra taldeko jokalari espainiar bakarrak jaso
zuen. Perez Candelario nazioarteko maisuak Korneeven kontra galdu zuen. Baina
Txeparinovek, Rublevskik eta Kamskik irabazi zituzten euren partidak. Horrek,
hain zuzen, Adams eta Sargissianen berdinketekin batera eman zion titulua talde
espainiarrari . Bereziki nabarmentzekoa da Kamski errusiarraren -Amerikako
Estatu Batuetako herritartasuna duen arren- jokaera ona. Ematen du jokalari
honek -bere garaian mundu osoan etorkizun handienetarikoa zuen jokalaria zen,
eta xakea utzi zuen ikasketetan buru-belarri murgiltzeko- bere maila
berreskuratzeko bidean jarraitzen duela xakera bueltatu zenetik.
Grosekoek, aldiz, norgehiagoka
zaila eduki zuten atzo Errusiako Tomsk taldearen kontra. Azkenean donostiarrak
13. postua lortu dute. Berdinketa gutxienez behar zuten donostiarrek iazko
zazpigarren postua hobetzeko aukeraren bat izateko. Baina Tomsk faboritoen
artean izan zen hasieratik eta Grosen kontra erakutsi zuten zergatik. Groseko
talde titularreko jokalariek Tomskekoek baino elo gutxiago eduki zituzten sei
tauletan. Hala ere, Van Welyk lortu zuen Morozevitxekin berdintzea, Milovek
Jakovenkokin emaitza berdina lortu zuen eta Pengxiang Zhang txinatarrak ere
Karjakinekin puntu erdia lortu zuen. Azken bi tauletan ere Bauerek eta
Hamdouchik lortu zuten berdintzea Inarkievekin eta Tkatxievekin. Baina
norgehiagoka laugarren taulan erabaki zen. Andrei Istratescuk Kasimdzhanoven
aurka galdu zuen eta 3,5-2,5 galdu zuten orotara donostiarrek. Errumaniatik
etorritako fitxaketak ez du oso torneo ona bete eta zazpi partidetatik bost
berdindu ditu eta bi galdu.
Euskal jokalariei dagokionez
aukera gutxi izan dituzte jokatzeko. Hala ere, egin dutena ondo atera zaie.
Lehen txandan Iņigo Argandoņak irabazi zuen bere partida seigarren taulan, eta
bigarren txandan Santiago Gonzalezek berdinketa lortu zuen ere taldeko azken
taulan.
Š berria.info