Osteguna, 2007ko urriak 25.

Gros xake taldea laugarren sailkatu da Espainiako Txapelketan.

Josu tornaY.

DonostiA.

Espainiako Ohorezko Maila Europako gogorrenetarikoa da. Aurtengo Europako txapelketak hori berriz erakutsi du -Extremadurako Linex-Magic nagusitu da- eta pasa den asteburuan jokatu den Ohorezko Mailako lauko finalak ere. Calvian (Mallorka, Herrialde Katalanak) jokatu da finala eta Linex-Magic (Xirov, Adams ...), Merida Patrimonio de la Humanidad (Jakovenko, Alekseev...), Jaeneko Tiendas UPI (Gristxuk, Bacrot, Vallejo...) eta Donostiako Gros Iretza egon dira lehian.

Zapatuan jokatu ziren final erdietan Merida Patrimonio de la Humanidadek donostiarrak jipoitu zituzten bost eta bat. Iñigo Argandoñak seigarren taulan Llanesen aurka eta Vadim Milovek lehenengoan Jakovenkon aurka lortu zituzten berdinketa bakarrak. Izan ere, Gros Iretza taldeko beste lau jokalariek galdu egin zuten. Beste final erdian lehia oso estua egon zen eta Linex-Magicek 3,5-2,5 gainditu zuen Tiendas UPI.

Gauzak horrela, donostiarrentzat hirugarren postua zen helburua domekako norgehiagokei begira. Aurrean Tiendas UPI talde sendoa zeukaten. Andaluziako taldeak 4-2 gainditu zituen donostiarrak. Groseko taldean Bauerrek eta Andresek galdu zuten eta beste guztiek berdinketak lortu zituzten norgehiagokan. Berdinketen artean Iñigo Argandoñarena nabarmendu behar da Rodriguez Guerrero maisu handiaren aurrean egin baitzuen. Bestalde, Extremadurako taldeen arteko derbya ikusi ahal izan zen finalean. 2,5-3,5 irabazi zuen Linex-Magicek. Bost partidetan berdinketak izan ziren eta Txeparinoven garaipenak eman zion Meridako taldeari Espainiako Txapelketan garaipena.

Merida Patrimonio de la Humanidad ez zen faboritoa torneoan. Talde sendoa zeukan, baina bai Linex-Magic eta baita Tiendas UPI taldeek indartsuagoak ematen zuten, behintzat eloak eta izenak kontuan hartuta. Bestalde, Donostiarrek aukera gutxi zeukaten hiru talde hauen aurrean eta apur bat ezustekoa ematera joan ziren Mallorkara. Ezin izan zuten helburua erdietsi. Izan ere, taldeko jokalariak partida bakar bat irabazi gabe itzuli ziren lehiaketatik.

Puntuaketa onena lehen eta azken tauletan egin zuten donostiarrek. Lehenengoan Milovek bi partidak berdindu zituen eta Argandoñak berdina egin zuen azkeneko taulan. Tkachiev eta Cifuentesek bat berdindu eta beste bat galdu zuten eta Andresek eta Bauerrek biak galdu zituzten.

© berria.info