Ponomariovek lehen postuari eusten dio Txapeldunen Ligan

josu tornay

Donostia

Hilaren 2tik ari da jokatzen Gasteizen xakeko Txapeldunen Liga torneoa. Maila ezberdinetan munduko txapeldun izandako jokalariak oso ongi ari dira jokatzen Gran Hotel Lakuan. Torneoko jokoa ona bada, hotelean egin den muntaia ere ikaragarria da: hotsgabetutako urna batean jokatzen dute jokalariek eta zaleek gertu gertutik ikus ditzakete partidak. Pantaila erraldoiak ere badaude, eta Alfonso Romero maisu handiak eta Leontxo Garcia nazioarteko maisuak partidak komentatzen dituzte. Halaber, torneoan egiten diren ekintza paraleloekin ateratzen den dirua Kongoko Errepublika Demokratikoko ospitale bati laguntza emateko erabiliko da.

Karpov, Topalov, Ponomariov, Polgar, Kasimdzhanov eta Khaliffmanek aritu behar zuten hasiera batean. Hala ere, azken unean Nisipeanu errumaniarrak Khaliffmane ordezkatu zuen, errusiarra gaixo baitzegoen. Hainbeste jokalari on izanda, zaila zen faborito bat izendatzea. Hala ere, Topalov ageri zen kiniela guztietan faborito moduan, nahiz eta bulgariarra duela gutxi jokatutako Europako Txapelketan ez zen ondo aritu. Halere, Gasteizko torneoko lehen txandan Karpov gainditu zuen, eta faboritoa zela berretsi. Hori bai, laugarren txandan, Polgarrekin galdu zuenean, eta Ponomarioven ziurtasuna ikusita, pixkanaka ukraniarra hasi zen faborito moduan agertzen. Ponomariovek lehen txandan Polgar gainditu zuen, eta, bigarrenean, Nisipeanurekin berdindu zuen. Hirugarren txandan, eta partida eder batean, berriz, Karpov gainditu zuen, eta buruan ipini. Azken bi txandetan berdindu egin du Kasimdzhanovekin eta Topalovekin. Beraz, lehen itzulia bukatuta ukraniarra da nagusi torneoan. Puntu erdi ateratzen die Polgarri eta Topalovi.

KARPOV, BURUMAKUR. Karpoven jokoa apur bat arraroagoa izan da. Adibidez, lehen partida denboragatik galdu zuen. Denbora larregi erabili zuen hasierako mugimenduak egiteko, zuriekin. Hasi berrien hutsa dela esan daiteke. Noski, partida zaildu zenean ez zuen nahiko denbora izan mugimenduak betetzeko, eta galdu egin zuen. Ponomariovekin ere, nahiz eta zuriekin jokatu, posizio txarragoa lortu zuen, eta bere saiakerek ez zuten fruiturik lortu. Lehen hiru partidetatik bi galtzea oso hasiera eskasa da munduko txapeldun ohiarentzat. Gaur atsedena izango dute jokalariek, eta bihar bigarren itzulia hasiko da.

© berria.info