Asteartea, 2007ko abenduak 18.
«Ofizialtasunaren bidean indarrak areagotzeko eskatzen
dugu».
Hilaren 29an Bilbon egingo den manifestaziora joateko eskatu du Euskal
Herriko kirolari talde batek.
unai zubeldiA.
DonostiA.
Euskal Herriko hainbat kirolari,
atzo, Donostian egindako agerraldian; euskal selekzioen aldeko aldarrikapena
egin zuten guztiek. IMANOL OTEGI/ARGAZKI PRESS.
«Euskal Herria munduaren aurrean
ordezkatu ahal izateko, Euskal Herriko kirolariok bilduko gaituzten federazioak
behar ditugu». Euskal Herriko kirolari multzo batek idatzi bat adostu du Euskal
Herriak nazioarteko txapelketa ofizialetan parte hartzeko daukan eskubidea
aldarrikatzeko. Atzo egin zuten aurkezpena, Donostian, eta eskaera argia egin
zieten Euskal Herriko eragile politikoei eta kirol federazioei.
«Ofizialtasunaren bidean aurrera egin eta Euskal Herriko selekzioek nazioarteko
txapelketa ofizialetan parte hartzeko duten eskubidea bermatu arte indarrak
areagotzeko eskatzen dugu».
Hilaren 29an Euskal Herriak eta
Kataluniak nazioarteko partida jokatuko dute Bilbon, eta egun horretarako
antolatutako ekimenen harira adostu dute aldarrikapena Euskal Herriko 100 bat
kirolarik. «Euskal herritar eta kirolari gisa, azken hilabeteetan arrazoi
ezberdinengatik Euskal Selekzioen inguruan sortu den zalaparta ikusita». Mikel
Aranburu Realeko jokalariak irakurri zuen komunikatua euskaraz, gainerako
kirolarien izenean, eta espainierazkoa Angela Vilariño pilotuak irakurri zuen.
Euskal Herriko eragileei ez
ezik, Espainiako eta Frantziako eragile politikoei eta kirol federazioei ere
eskaera argia egin diete kirolariek: «Euskal Selekzioaren aurkako erasoak alde
batera utzi, eta euskal kirolariok nazioarteko txapelketa ofizialetan Euskal
Herria ordezkatzeko dugun eskubidea errespetatu. Aukera eman iezaguzue. Ez
diogu inori ezer kendu nahi, dagokiguna eskuratu baizik».
Ellande Alfaro pilotariak
irakurri behar zuen idatzia frantsesez, baina, agerraldian frantsesez aritzen
den komunikabiderik ez zegoenez, euskaraz egin zuen aldarrikapena. «Ipar Euskal
Herrian egitura administratiborik ez denez, hiru lurraldeak batzen dituen
federaziorik ez dago. Zailtasun bat gehiago, beraz. Baina kirolariok federazio
nazionalak behar ditugu, horrek ekarriko du selekzioa».
Euskal Herriak nazioarteko
txapelketetan jokatzea kirolarien esku soilik ez dagoela jakinda ere,
Aranbururen hitzetan, argi daukate ofizialtasunaren alde lan egitea euren
zeregina ere badela. «Gu euskaldunak gara, gure selekzioa Euskal Herriko
selekzioa da, eta argi eta garbi azaldu nahi dugu gure esku dauden pausoak
emateko prest gaudela».
«Euskal herritar eta kirolari
gisa», hausnarketa batek batu ditu kirolariak: «Nazio bat gara: Euskal Herria.
Eta, ondorioz, nazioarteko txapelketa ofizialetan parte hartzeko eskubidea
dagokigu».
DEI BEREZIA
EUSKAL HERRITARREI. Abenduaren 29an 20:30ean hasiko da Euskal Herriaren eta
Kataluniaren arteko partida, baina aurretik ESAIT Euskal Selekzioen Aldeko
Iritzi Taldeak Bilboko Areatzan jaialdia antolatuko du. «Futbol partidaren
aurretik ESAITen gunera joateko eta 17:30ean Euskal Herria: Nazio bat,
Selekzio bat lelopean Casilla kiroldegitik irtengo den manifestazio
nazionalean parte hartzeko dei egiten dizuegu».
Abenduaren 29koa kirol munduko
jaia eta aldarrikapena izaki, herritarren babesa eskatzeaz gain, atzo Donostian
bildutako kirolariek gainerako kirolariei ere eskatu zieten ekimenarekin bat
egiteko: «Dei berezia egiten dizuegu Arabako, Bizkaiko, Gipuzkoako, Nafarroa
Behereko, Nafarroa Garaiko, Lapurdiko eta Zuberoako kirolari guztioi ibilbidea
manifestazioaren buruan kirolarientzat gordeko den gunean egin dezazuen».
############
«Nazio bat
gara, eta nazioarteko txapelketa ofizialetan parte hartzeko eskubidea
dagokigu».
«Gure
selekzioa Euskal Herriko selekzioa da, eta gure esku dauden pausoak emateko
prest gaude».
mikel aranburU.
Kirolarien bozeramailea.
############
############
KIroLarIen
zerrenDa.
Besteak beste, ondorengo
kirolariak izan ziren atzo Donostiako Doka kafe antzokian egindako agerraldian,
kirol arloka sailkatuta:
Futbola. Mikel Aranburu, Mikel Labaka, Gaizka Garitano, Jon
Ansotegi, Aritz Aduriz, Igor Gabilondo, Ustaritz Aldekoaotalora, Joseba
Garmendia, Ander Alaña, Mikel Etxabe, Javier Gurrutxaga, Xabier Eizagirre, Jon
Altuna, Markel Robles, Jon Urzelai eta Eneko Romo.
Txirrindularitza. Arantzazu Azpiroz, Leire Olaberria, Mikel Astarloza,
Haimar Zubeldia, Iñigo Chaurreau, Unai Etxebarria eta Amets Txurruka.
Pilota. Aratz Mendizabal, Kepa Peñagarikano eta Ellande Alfaro.
Triatloia. Ainhoa Murua eta Itsaso Leunda.
Harri-jasotzea. Aimar Irigoien eta Iñaki Perurena.
Sega. Andoni Goikoetxea.
Arrauna. Zumaia eta Urdaibai arraun taldeak, Jose Luis Korta,
Juan Mari Etxabe, Iñaki Errasti, Jon Salsamendi eta Izortz Zabala.
Eskubaloia. Ane Karrere eta Amaia Ramirez.
Igeriketa. Sara Carracelas eta Ivan Agirre.
Atletismoa. Iban Maiza eta Asier Cuevas.
Bela. Amaiur Alfaro.
Boccia. Yolanda Martin.
Piraguismoa. Jon Erguin.
Eskia. Mitxel Blanco.
############
©
berria.info