Larunbata, 2007ko abenduak 29.
'Balinda': Euskal Herria.
Iñigo Santxo UriartE.
ESAITeko kidea.
Gogoan dut ETBn ematen zutela
euskararen inguruan eduki pedagogikoa zuen programa bat, Ezinda, Balinda
titulupean, Kike Amonarrizek eta Andoni Egañak bideratzen zutena, Miren
Azkaratek ere parte hartzen zuelarik.
Ume hizkeratik ei datorren
aforismo hori zeharo positiboa da, izan ere, Balinda-k, itzulpenik ez
omen duen arren, Ezinda, balinda formulak, balio baitu adierazteko
debeku absurduen aurrean ekin eta ekinez lorpenak eskuratu daitezkeela.
Bizitza laburra bada, kirolarien
lehia-bizitza are laburragoa, eta urtetik urtera min handiz ikusten dugu Euskal
Selekzioen alde buru-belarri jardun duten kirolari ugarik beren kirol-erretreta
hartzen dutela, gure Herriaren Selekzio ofizialarekin lehiatzeko aukerarik izan
gabe. Beraz, Selekzioen gaiak, lehentasunezkoa baino gehiago, premiazkoa behar
du izan.
Euskal Selekzioen gaineko
debatean, maiz esan ohi da ofizialtasuna ez dagoela bakarrik gure esku, eta
horrela da, Euskal Kirol Federazioen ofizialtasuna lortu ahal izateko faktore
nagusia kanpokoa baita.
Euskal Federazioei Nazioarteko
Federazioetarako sarrera eskatzea dagokie, baina Nazioarteko Federazioetan,
erakunde pribatuak diren heinean, bazkide berrien onartzeko beren bazkideek
dute hitza. Nazioarteko Federazioetako bazkideen botoa, sarritan, kirol
irizpideetan baino gehiago, irizpide politiko edo ekonomikoetan oinarritzen da,
sartu nahi duen Federazioak zuzen ala zeharka egingo duen «ekarpenarekin»,
finean, duen «erosteko ahalmena»-rekin, eta kontuan hartzen badugu Kirol
Federazioak orokorrean ez direla erakunde aberatsak ezta boteretsuak ere, bere
«arrazoien pisua» neurtzen da, bere Herrialdeko Gobernuak ematen dion
«babesa»-rekin.
Gure kasuan publikoa da estatu
espainol eta frantseseko agintarientzako Kirol Selekzioen gaia, lehen mailako
auzia, «Estatu auzia» dela, Euskadikoentzako, aldiz, oraingoz ez. Madrilgo
Gobernuaren aurrekontuak ere babestu izanak ziurtatzen du aurreko baieztapena.
Autonomi Erkidegoek sortzen
dituzten barne legeak Nazioarteko Federazioen barruan aldeko iritziak
sustatzeko baliagarriak izan badaitezke ere, ofizialtasunaren alde egin
ditzaketen pronuntziamenduak mugatuak dira, ezin baitezakete baldintzatu
Nazioarteko Federazioetako bazkideen botoa. Esan bezala, Nazioarteko
Federazioetako bazkideen botoak eskuratu ahal izateko, exekutiboen babes
eraginkorra ezinbestekoa da.
Euskadiko, zein Nafarroako Kirol
Legeek ofizialtasunarekin baino, zerikusi handiagoa izan dezakete
lurraldetasunaren planteamenduarekin, gure Herriaren kirolaren egituratzearekin
hain zuzen ere; finean, Hego Euskal Herriko Kirol Federazio nazionalak sortzeko
aukerarekin. Aukera hori egingarria izateaz gain, bi Autonomia Erkidegoetan
kirolaren gaineko eskumen esklusiboa dagoen aldetik, gure esku ere badago.
Beste esparru batean dagoen adibidea argia da, Euskal Herriko Ikastolen
Konfederazioa.
ESAIT Euskal Selekzioen Aldeko
Iritzi Taldearen planteamendu guztien ardatzak sorreratik beti berdinak izan
dira: Lurraldetasuna eta ofizialtasuna. Bi kontzeptuok gure jardueraren
zurtoinak badira ere, aurrerapauso eraginkorrak lortu ahal izateko, eta gaiak
duen premia kontuan hartuta, ez dugu arazorik, ezta konplexurik ere,
planteamendu taktikoetan aipatu ardatzen presentzia modulatua onartzeko. 1998an
Euskadiko Kirolaren Legeari emandako babesa testuinguru eta era horretan ulertu
behar da.
Kirol Legea babesteko arrazoia
Euskal Kirol Federazioen Batasunaren definizioan oinarritu zen. Baina, 2002.
urtean, gure Herriaren testuinguru politikoa 1998koarekin alderatuta, erabat
aldatuta zegoenean Eusko Jaurlaritzak dekretuz sortu zuen Euskal Kirol
Federazioen Batasuna. Dekretu horrek erabat hautsi zituen 1998an Legeari babesa
emateko hitzartutako baldintzak, Federazioen Batasunak lurraldetasunaren
gainean izan behar zuen diseinu organiko adostua, hain zuzen ere. Areago, egun,
Kirol Saileko Zuzendaritzak Kirolaren Legea eta Federazioen Batasuna baliatzen
ditu euspen-horma gisan, orokorrean Euskal Federazioetan ofizialtasunaren
aldeko jarduera eta aldarrikapenak fiskalizatu, eta bereziki, ESAITen ekimenak
neutralizatu eta ezeztatzeko; Abanto-Zierbena, Mungia eta beste hainbat
herritan Euskal Selekzioen inguruan aurkeztutako kontramozioek agerian utzi
duten eran.
Euskal Selekzioa ezin da
Extremadura edo Murtziako Selekzio autonomikoaren baliokidea izan, hemen
ofizialtasunak galdatzen du eragile sozial eta kirol eragile guztiek adostutako
Plan berezitu baten diseinua; ofizialtasuna ezin da geratu Federazioen
kudeaketa arruntean, aurrerapausoak zehatzak behar dira, eta Nazioarteko
Federazioetan sarrera eskatu behar da. Ildo horretan, Eusko Jaurlaritzako Kirol
Zuzendaritzari eta Kirol Federazioen Batasunari galdetu behar diegu ea zergatik
eragozten dieten Euskal Federazioei Nazioarteko Federazioetan sarrera eskatzea.
Erantzunaren zain gaude.
Amaitzeko aurtengo lagunarteko
partidarako Euskal Selekzioaren izenari egindako aldaketaren gainean apreziazio
pare bat: Batetik txalogarria izan da kirolarien eta bereziki futbolarien
ekimena eskaria artikulatzeagatik, baita Federazioaren erabakia ere, eskaria
atendituz, ezinezkoa ematen zuen aurrerapausoa eman duelako eta, bestetik,
erabakiaren zentzu pedagogikoa azpimarratu nahi dut, izen aldaketa hau Euskal
Herriko gainontzeko kirol-diziplinatarako baliagarria baita.
Aurtengoan esan badezakegu,
Euskal Herria: Balinda, ea datorren urtean Euskal Herriko Selekzio ofizialak balinda
ditzakegun...
############
Eusko
Jaurlaritzako Kirol Zuzendaritzari eta Kirol Federazioen Batasunari galdetu
behar diegu ea zergatik eragozten dieten Euskal Federazioei Nazioarteko
Federazioetan sarrera eskatzea. Erantzunaren zain gaude.
############
©
berria.info