berria.info

Asteartea, 2008ko irailak 2.

Inoizko torneorik handiena.

Munduko xake jokalari onenetariko sei Bilbon lehiatuko dira hilaren 13ra arte, Plaza Barriko kubo batean.

Josu TornaY. BilbO.

Grand Slameko parte-hartzaileak atzoko aurkezpenean. Ezkerretik eskuinera: Aronian, Carlsen, Radjabov, Ivantxuk, Anand eta Topalov. MIGUEL TOŅA/EFE.

Gaur hasi, 17:00etan, eta irailaren 13ra arte, inoizko maila handieneko xake torneoa jokatuko da Bilbon. Joan zen astean Moskuko torneoan gertatutako ELO sailkapeneko aldaketekin, 2.775 puntuko batez besteko muga gaindituko da Grand Slameko finalean. Beraz, historiako 22. Mailako lehen torneoa izango da. Orain arte 21. Maila zen muga: 2007an Mexikon jokatutako Munduko Txapelketan, 2007ko Las Palmasko torneoan eta 2008ko Linares-Moreliakoan lorturikoa.

Munduko zortzi jokalari onenetatik sei izango dira Bilbon: Viswanathan Anand indiarra, sailkapeneko lehena eta munduko txapelduna; Vassili Ivantxuk ukrainarra, munduko bigarrena Moskuko torneoaren ostean; Magnus Carlsen norvegiarra, hirugarrena;Vesselin Topalov bulgariarra, bosgarrena; Teimur Radjabov azerbaijandarra, zazpigarrena; eta Levon Aronian armeniarra, zortzigarrena.

Parte-hartzaileek Grand Slameko torneoetan eginiko jokaeragatik lortu dute gonbita Bilboko finalerako. Anand Linaresen irabazteagatik sailkatu zen, Ivantxuk Sofian, eta Aronian Wijk ann Zeegan. Carlsen, Topalov eta Radjabovek ere puntuaketa onak lortu zituzten torneo horietan.

Sari aldetik ere historiako torneo garrantzitsua izango da Bilbokoa. Lehen sailkatuak 150.000 euroko saria jasoko du; bigarrenak, 70.000; hirugarrenak, 60.000; laugarrenak, 50.000; bosgarrenak, 40.000; eta seigarrenak, 30.000. Hori bai, arautegi gogorra jarri dute antolatzaileek ikuskizuna ziurtatzeko. Adibidez, parra egiteko aukerak murriztu egin dituzte; epaile nagusiak bakarrik erabaki ahal izango du berdinketa, bi adituren aholkuarekin.

Jokalari bakoitzak bi aldiz jokatuko du beste aurkarien aurka ligaxka sisteman, behin beltzekin eta behin zuriekin, eta puntuaketa sistema ere berezia izango da berdinketak gutxitzeko. Futbolean bezala, garaipenek hiru puntu balioko dute, eta berdinketak bat. Torneoa E4 Chessport xakean espezializatutako enpresak antolatuko du: hark antolatu du orain arte Bilbo Hiria torneoa, baita munduko puntako hainbat torneo ere.

Bitxikeriaz jositako torneoa izango da. Horrelako kalitateko torneo batean aurrenekoz, partida guztiak kalean jokatuko dira, horretarako bereziki prestatutako kubo baten. 264 metro kuboko karpa erraldoia egongo da Plaza Barrian, erabat soinugabetuta eta klimatizatuta. Beste gune bat egongo da partidak aztertzeko, eta beste bat zaleek partidak eta adituen komentarioak jarrai ditzaten. Adituen artean Maisu Handi garrantzitsuak izango dira: Spasski munduko txapeldun ohia, Polgar eta beste batzuk. Zaleentzat eta umeentzat ere torneoak eta beste ekintza batzuk antolatu dira.

Anand da faboritoa.

Sei jokalariak sasoiko daude, eta edozeinek irabaz dezake, baina Anandek dauka lorpen zerrenda garrantzitsuena: munduko txapelduna da, sailkapeneko lehena eta ligako torneoetan espezialista. Indiarra da, Madrasen 1969an jaioa, eta aspalditik dago xake munduko elitean. Kasparovekin lehiatu zen PCAko munduko txapelketako finalean 1995ean, New Yorkeko World Trade Centerren, eta, galdu arren, munduko bost onenen artean egon da harrezkeroztik. Iaz Mexikon munduko txapelketa bateratutako torneoa irabazi zuen, eta titulua defendatu beharko du urrian, Kramniken aurka. Hori baino lehenago azken torneoa izango du Bilbokoa.

Magnus Carlsen norvegiarra ume mirarizkoa izan zen: 5 urterekin jokatzen ikasi, eta 13 urterekin Maisu Handi titulua eskuratu zuen. Torneo ona eginez gero, FIDE sailkapeneko lehen postuan kokatzeko aukera izango luke. Hala balitz, balentria hori lortzen duen jokalaririk gazteena litzateke, 17 urte baititu.

Vassili Ivantxuk aspalditik dago xakearen goi mailan, eta, urte askoan bigarren lerroan ibili ondoren, azken urteotan lehen postuetara bueltatu da. Jokalari beteranoak torneo garrantzitsuak irabazi ditu, azkena Moskuko Talen oroimenezkoa, puntu bateko aldearekin.

Topalov borrokalari handia da, eta torneo guztietan erakusten du grina. San Luisen (Argentina), FIDEko munduko txapelketa irabazi zuen 2005ean, baina hurrengo urtean Kramniken aurka galdu zuen titulua. Munduko txapelketarako hautagaien finala dabil orain prestatzen, azaroan Gata Kamski gainditzeko asmoz.

Teorian Radjabovek eta Aronianek dute torneoa irabazteko aukera gutxien , baina biek ere ibilbide arrakastatsua dute. Radjabov 12 urterekin izan zen 18 urte azpikoentzako Europako txapeldun, eta 15 urterekin Kasparovi irabazi zion Linaresen. Egun 21 urte ditu, eta Carlsenekin batera etorkizuneko xakeko ikur izateko bidean da. Aronian ere gaztea da: 25 urte ditu, eta ausart jokatzen du normalean. Beraz, ikuskizuna emango duela espero da Plaza Barriko kuboan.

Grand Slameko finala 22. maila lortzen duen historiako lehen torneoa da.

400.000 euro banatuko dituzte sarietan; irabazleak 150.000 jasoko ditu.

Partida guztiak ikusi ahal izango dira torneoaren webgune ofizialean: www.bilbaofinalmasters.com.

Š berria.info