berria.info

Asteartea, 208ko urriak 14.

Lehia taula gainean.

Vladimir Kramnikek eta Viswanathan Anandek Munduko Xake Txapelketa jokatuko dute gaurtik azaroaren 2ra.

Faboritorik ez dago, eta bi jokalarien maila kontuan hartuta, ikuskizuna ziurtatuta dago.

Josu TornaY.

Gaurtik azaroak 2ra jokatuko da Munduko Xake Txapelketako finala, Bonnen (Alemania). Duela 74 urte jokatu zen horrelako torneo bat azken aldiz Alemanian. 1934an Alexander Alekhine errusiarrak eta Efim Bogoljubov ukraniar-alemaniarrak jokatu zuten, eta Alekhine nagusitu zen. Aurten ere errusiar bat ariko da finalean: Vladimir Kramnik. Viswanathan Anand indiarra izango du aurrean, egungo munduko txapelduna. 1934ko finalean, berriz, errusiarra zen munduko txapelduna. Gainera, horrek erraz gainditu zuen txapeldungaia. Aurten, ordea, berdintasun handiko lehia izango da.

Hamabi partida jokatuko dituzte hilaren 31ra arte. Azaroaren 1a eta 2a, berriz, erreserbatuta daude irabazlea zehazteko partidak beharrezkoak balira. Xakezaleen zorionerako, partidetako erritmoa klasikoa izango da, eta kalitate handiko jokoa espero da. Kramnik defentsa eta estrategiako espezialista da. Anand, berriz, taktikarako eta erasorako bereziki dohatua. Oso jokalari ezberdinak dira, baina biak abilak.

Ez dago faboritorik. Ez batak ez besteak ez du gauza handirik erakutsi azken aldian. Anand gaizki ibili zen Bilbon, eta azkena izan zen. Kramnikek ez zen gaizki ibili abuztuan Moskun, baina ekainean askoz txartoago ibili zen Dortmunden (Alemania) zazpigarren sailkatuta. Hain zuzen ere, FIDEko zerrendetan Anand bosgarren da, eta Kramnik seigarren. Ez daude Veselin Topalovengandik oso urrun, baina aurretik ere Alexander Morozevitx, Vassili Ivantxuk eta Magnus Carlsen dauzkate. Apustuak Kramniken alde daude, buruz burukoetan espezialista baita. Aurkari erasokorren erasoak gelditu ditu horrelako maila handiko lehia batzuetan -Gary Kasparoven aurka 2000n eta Topaloven aurka 2006an-.

############

SoslaiA.

Vladimir KramniK.

Itsaso Beltzeko marrazoa.

Vladimir Kramnik 1975ean jaio zen, Moskun. Aita eskultore ezaguna izan zen, eta ama musika irakaslea. 5 urterekin hasi zen xakean, eta 16 urterekin Gazteen Munduko Txapelketa irabazi zuen. Kasparoven ustez, Kramnik belaunaldiko jokalaririk talentudunena zen. Horregatik sartu zuen bere analisten artean. Kramnik torneo garrantzitsuak irabazten joan zen, baina buruz burukoetan ez zituen emaitza onak izan. Hain zuzen, FIDEko eta PCAko hautagaien aurkako buruz burukoetan kanporatu zuten 1995ean. Haren entrenatzaile ohiak garbi zeukan erretzeak, edateak eta ohitura txarrek eragin handia zutela. Horren ondotik, errusiarrak ohiturak aldatu zituen.

Kramnikek xakea sakontasun handiz ulertzen du, eta joko posizionala nahiago du bariante zorrotzak baino. Defentsako espezialista da, eta oso iaioa posizio estuetan. Ez zaio axola itxarotea, eta, marrazoen moduan, aurkariak ahultzen ditu irabazi arte. Hortik datorkio goitizena.

Mendearen bukaeran, benetan zaila zen Kramnik gainditzea. Hain zuzen ere, 2000ko uztailean beste marka bat ezarri zuen: 86 partida galdu barik urte eta erdian. Garai hartan, bere garaipenik ederrena heldu zen: Kasparovi irabazi zion Munduko Txapelketa ez ofizialean. Kasparov faboritoa zen, baina Kramnikek defentsa gaindiezina planteatu zuen. Baliabideak ez zitzaizkion bukatzen, eta Kasparoven nerbioak gero eta okerrago zeuden. 15 partidetan, Kasparovek ez zuen partida bakar bat ere irabazi, eta Kramniken bi garaipenekin Kasparoven 15 urteko erreinua bukatu zen. Horren ostean, Kramnik ez zen torneo askotan ibili, baina agertu zenean ondo aritu zuen. 2004an bere ofizialtasunetik kanpoko munduko titulua defendatu zuen Lekoren kontra.

2005ean osasun arazo larriak izan zituen. 2006an itzuli zen, sasoiko. FIDEk zerbait egin behar zuen, eta Elistako torneoa irtenbide ona izan zen munduko txapelketa bateratzeko. Bere garaipenarekin Kramnik txapeldun bakar bihurtu zen, baina Topalovek tranpak egitea leporatu zion. Orain titulua berreskuratzeko aukera du eta salaketak isilarazteko. J. TornaY.

############

SoslaiA.

Viswanathan AnanD.

Madrasko tigrea.

Ekonomian lizentziaduna eta anitzeleduna da Viswanathan Anand (Madras, India, 1969). Nahiz eta Madrasko tigrea goitizena gaztetatik jaso, pertsona lasaia da indiarra. Collado Villalban (Madril) bizi da duela urte batzuk hona, eta bere izaera umila eta atseginak denen begikotasuna eman dio. Sobietar Batasunean jaio ez den xakelari onena da Bobby Fischer erretiratu zenetik. Indian heroi nazionala da.

Anand jaio zen urtean xake giro garrantzitsua zegoen Madrasen. Indiako lehen nazioarteko maisuak Madrasekoak ziren, eta, han, Sobietar Batasuneko enbaxadak sustatuta, Mijail Tahl xake klub ospetsua zegoen. Ananden talentu naturala batez ere partida bizkorretan ikusi zen txikitatik. Ananden ibilbideko unerik erabakigarriena seguraski 1987an ailegatu zen, gazteen Munduko Txapelketa irabazi zuenean. Bere izena zabaldu zen mundu osoan. Hala, «demonioak bezain bizkor mugitzen den gaztetxo indiarra» bataiatu zuen garai hartako aurkari batek. Maisu Handien titulua 18 urterekin lortu zuen. Baina ezusteko ez atseginen bat ere jaso zuen hain bizkor mugitzearren. Garbi zegoen haren ohitura batzuk aldatu behar zirela gorago ailegatzeko.

Maisu Handien titulua lortu ostean, urte txar batzuk pasatu zituen Anandek. 1991n gauzak hobeto joan ziren, eta Munduko Txapelketako hautagaien lehiarako sailkatu zen. Anatoly Karpov egokitu zitzaion final-laurdenetan, eta, nahiz eta lehia ona jokatu, galdu egin zuen. Halere, 1991ko gabonetan ikusi zen handienen artean sartuko zela. Reggio Emilia torneoan, 90eko hamarkadako lehen supertorneoan nagusitu zen Karpoven eta Kasparoven aurretik.

1993an, PCAko eta FIDEko torneoak jokatzen saiatu zen, eta bietan izan zen hautagai. FIDEkoan Gata Kamskyk kanporatu zuen, eta PCAkoan finalera heldu zen, Kasparoven kontra. Baina 1995ean, Kasparov unerik onenean zegoen, eta tituluari eutsi zion. 1998an, FIDEk bultzatutako formatu berria irabazi zuen Anandek eta Karpoven aurka finala jokatzeko eskubidea lortu zuen, baina berdinketa hausteko partidetan galdu egin zuen.

Karpovek eta Kasparovek XX. mendeko azken 25 urteak menperatu zituzten, eta hori oztopo garrantzitsua izan da belaunaldi oso batentzat, Anand barne. Munduko Txapelketa irabazteko aukerak XXI. mendetik hurbil hasi ziren zabaltzen: 2000n Kramnikek Kasparov gainditu zuen Braingames Munduko Txapelketan, eta Anandek Shirov FIDEkoan. Bi txapeldun, beraz. Orain txapeldun bakarra da Anand, eta Bonneko lehia aukera ona da indiarrak Mexikon lortu zuen txapela merezi zuela erakusteko. J. TornaY.

############