Ostirala, 2009ko urtarrilak 9.

Bihar hasiko da xakeko Euskal Liga.

Grosek eta Sestao Naturgasek talde bikainak egin dituzte, eta titulua lortzeko hautagai nagusiak dira.

Erredakzioa. DonostiA.

Euskal Herriko xake taulak sutan jarriko dira bihartik aurrera, Ohorezko Mailako Euskal Liga hasiko baita. Hamar talde ariko dira lehian: Gros, Sestao Naturgas, Orvina, Batalla, Ruta de Europa, Zuri Baltza, Kultur Sustapena, Barakaldo, San Viator eta Rey Ardid. Faboritoak azken urteetako berak dira, Gros eta Sestao, hain zuzen ere. Biek ala biek talde bikainak dituzte. Bizkaitarrek, adibidez, etorkizun bikaineko bi jokalari fitxatu dituzte: Maxime Vachier-Lagrave (2.716 elo eta munduko 25 onenen artean iaz) eta Edouard Romain frantziarrak (2.531 elo).

Lehen jardunaldia bihar jokatuko da. Orvinak Sestaoren aurka jokatuko du; Batallak Grosen aurka; Ruta de Europak Zuri Baltzaren aurka; Kultur Sustapenak Barakaldoren aurka; eta San Viatorrek Rey Ardiden aurka.

© berria.info