Ostirala, 2009ko urtarrilak 9.

Selekzioei nazioartean lehiatzea galarazi die EAEko Auzitegi Nagusiak.

Hogei federaziok Euskadi nazioarteko lehiaketetan ordezkatzeko debekua berretsi du auzitegiak.

Erredakzioa. DonostiA.

Euskal Autonomia Erkidegoko (EAE) Justizia Auzitegi Nagusiak berretsi egin zuen atzo EAEko kirol federazioek ezin dutela Euskadi nazioarteko lehiaketetan ordezkatu. Erabaki horrekin Auzitegi Nagusiak behin-betiko egin du 2007ko urrian hartutako behin-behineko erabakia. Orduan EAEko Justizia Auzitegi Nagusiak bertan behera utzi zituen federazioen estatutuetako 5. eta 6. puntuak, federazioek «Arabako, Bizkaiko eta Gipuzkoako ordezkaritza gainditu eta euskal kirola nazioarteko lehiaketetan ordezkatzea ahalbidetu zezaketelako». Federazioek erabaki horren aurkako helegitea aurkeztu zuten, baina EAEko Justizia Auzitegi Nagusiak aurretik hartutako erabakia berretsi du.

EKFB Euskal Kirol Federazioen Batasunak eta ESAIT Euskal Selekzioaren Aldeko Iritzi Taldeak gogor salatu zuten orduan EAEko Justizia Auzitegi Nagusiak hartutako erabakia. EKFBk azpimarratu zuen Euskadiko Federazioek nazioartean lehiatzen jarrai dezaketela. EKFBk gogoratu zuen 1999ko otsailaren 9an ere EAEko Justizia Auzitegi Nagusiak Euskadiko Federazioak nazioartean parte hartzea debekatu zuela, baina, hala ere, nazioartean lehiatzen jarraitu dutela.

ESAITek gogor salatu zuen Espainiako Gobernuaren jarrera. ESAITek esan zuen «Euskal Herri gisa kirol diziplina guztietan nazioarteko txapelketetan parte hartu ahal izatea herri eskubidea» dela. Espainiako Gobernua Euskal Herriaren kirol eta giza errealitatetik «oso urrun» dagoela gaineratu zuen ESAITek, eta helegiteak aurkeztuta, Espainiako Gobernua Euskal Herriko kirol federazioen «etsai moduan» kokatu zuela bere burua. Horren aurrean, behar bezalako erantzuna emateko deia egin zuen ESAITek.

© berria.info