Astelehena, 2009ko martxoak 2.

Grosek gertu du txapela.

Donostiako taldeak 1-3 irabazi zion herenegun Sestaori, eta esku-eskura du Euskal Liga lortzea.

Josu Tornay. Donostia.

Roberto Cifuentes Gros taldeko jokalaria. MONTSERRAT T. DIEZ/EFE.

Egundoko ezusterik ezean, Gros-Iretza xake taldeak bederatzigarren aldiz irabaziko du Euskal Liga. Donostiako taldeak txapela eskuratzeko aurrerapauso ia erabakigarria eman zuen herenegun, Naturgas Energia-Sestao bigarren sailkatuari 1-3 irabazi ondoren. Euskal Liga amaitzeko bi jardunaldi falta direla, Gros-Iretzak bi puntuko aldea ateratzen dio Ruta de Europari, eta hiru puntu eta erdikoa Sestaori.

Azken urteotan bezala, Grosen eta Sestaoren arteko norgehiagokaren zain zeuden Euskal Herriko xakezale guztiak. Bizkaiko taldea apur bat ahulago aritu zen Ligan, eta puntu eta erdi atzetik zegoen sailkapenean. Horregatik garrantzitsua zen Sestaorentzat herenegun Grosi irabaztea. Berdinketa parekatua espero zen, eta zalantzan bazegoen ere Grosek bere izar guztiekin jokatu zuen.

Baina Sestaoko laukoteak, iaz bezala, ezin izan zion buelta eman egoerari. Donostiarrek aise irabazi zuten. Aurreneko bi buruz burukoetan berdinketak izan ziren: Alexander Moiseenko Sestaoko maisu handi ukrainarrak zuriekin berdindu zuen Van Wely Groseko herbeheretarrarekin, eta Edouard Romain Sestaoko frantziarrak Hicham Hamdoutxi Groseko marokoarrarekin. Hirugarren eta laugarren buruz burukoetan, ordea, Groseko jokalariek norgehiagoka erabaki zuten, bi partidak irabazita. Pablo San Segundo espainiarrak Mario Gomez santurtziarrari irabazi zion, eta Roberto Cifuentes txiletarrak Alejandro Franco espainiarrari. Etxeko jokalariekin jokatzeko estrategia atzean utzi zuen Grosek herenegun.

Bestalde, Ruta de Europak 0-4 gainditu zuen Barakaldo, eta Sestao aurreratu du sailkapenean. Arabarrak bigarren dira orain, 22 punturekin. Bi azken txandetan Ruta de Europak Sestao eta Grosekin jokatuko du. Horrek esan nahi du arabarrek titulua irabazteko aukera euren eskuetan dutela.

Sailkapeneko azken postuetan, berriz, Errenteriako Kultur Sustapenak eta Bilboko Rey Ardidek maila galdu dute, herenegun Santutxuko Zuri Baltzaren (2,5-1,5) eta Pasai Donibaneko Batallaren aurka galdu ondoren (0,5-3,5). Zuri-Baltzak oraindik mailari eusteko aukera du, baina, horretarako, Gasteizko San Viator harrapatu beharko luke sailkapenean. Hori zaila izango da, kontuan edukita bizkaitarrek datorren txandan Sestaoren kontra jokatuko dutela.

Lehia estua Lehen Mailan.

Lehen Mailan, berriz, Aretxabaletako Arlutzek 2,5-1,5 galdu zuen herenegun Iruñean Oberenaren kontra, eta orain Nafarroako taldea da lehena sailkapenean. Hala ere, nafarrak eta gipuzkoarrak dira oraindik faborito nagusiak lehen bi sailkatuak izateko. Eurekin Ohorezko Mailara igotzeko aukera gehien duen beste taldea Easo da, Sestao B eta Iruñeko Orvina B ezin baitira igo -taldea dute Ohorezko Mailan-. Jaisteko ez borrokan, berriz, mailako ia talde guztiak daude, eta, ziurrenik, azken jardunaldiko azken mugimendura arte ez da ezer erabakita geratuko. Lehia gogorra, beraz, ziurtatuta dago.

############

Sailkapena.

EUSKAL LIGA.

1. Gros 24 puntu.

2.Ruta de Europa 22 puntu.

3. Sestao 20,5 puntu.

4. Orvina 17 puntu.

5. Batalla 13,5 puntu.

6. San Viator 11 puntu.

7. Barakaldo 10,5 puntu.

8. Zuri Baltza 9 puntu.

9. Kultur Sustapena 6,5 puntu.

10. Rey Ardid 6 puntu.

############

© berria.info