Larunbata, 2009ko uztailak 25.

Euskal Selekzioaren XI. eguna ospatuko da bihar, Pausuan.

Esaiten ekitaldiaren helburua Euskal Herriak selekzio ofizialak izateko duen eskubidea aldarrikatzea da.

J. Eskudero.

Badira hamar urte ESAITek euskal selekzioaren aldeko eguna antolatzen duela, eta bihar egingo dute hamaikagarren ekitaldia, Pausun (Behobia gisa ere ezagutua; Irun eta Urruñako auzoa). Ekimenaren helburu nagusia Euskal Herriak nazioartean bere selekzio propioak izateko duen eskubidea aldarrikatzea da.

Urtero egun hau antolatzeko arrazoi nagusia «Espainiako eta Frantziako Gobernuek Euskal Herriko selekzioari jartzen dizkioten oztopoak eta errespetu falta alde batera utzi eta Euskal Herriak bere selekzio propioa izateko duen eskubidea» aldarrikatzea da. Ez da hori, baina, ESAITeko kideek aditzera eman nahi duten gauza bakarra. Izan ere, «Euskal Herrian ez dago kirol egitura nazionalik, EAEko federazioak, Nafarroa Garaikoak eta Iparraldekoak ez baitute elkarrekin lan egiten, eta Euskal Herria zazpi probintziaz osaturikoa izanik, hiru federazio horien batasuna egitea» aldarrikatu nahi dute.

Bihar goizeko 10:30ean hasiko da jai giroa Pausun, eta egun guztian hainbat ekitaldiz gozatzeko aukera izango da: Bertsolariak, txalapartariak, herri kirolak, kontzertuak... Eguraldiaren aitzakiarik ez da izango, eta ESAITek bertara gerturatzeko deia egin du, denen artean euskal selekzioaren eskubideak aldarrikatzeko asmoz.

############

Egitaraua.

10:30. Selekzio egunaren hasiera, ikurrinaren igoerarekin. Txalapartariak eta bertsolariak ariko dira.

11:00. Ekitaldi nagusia. Urruña eta Hendaiako herriko etxeetako ordezkariek eta ESAITeko kideek hitz egingo dute.

11:30. Mutxikoak.

12:30. Herri kirolak.

14:00. Herri bazkaria Xaia ostatuan. Bazkarian herri kantak abestuko dira.

16:30. Haurrentzako jokoak.

17:30. Pilota partidak, esku-huskakoak eta palakoak.

19:00. Kontzertua CEL 3 Irlandako folk taldearekin.

############

© berria.info