Ostirala, 2009ko irailak 4.
Lehia beirazko kutxan.
Aronian, Gristxuk, Xirov eta Karjakin ariko dira lehian igandetik aurrera Bilbon, Xakeko
Grand Slam-ean.
Josu Tornay. Donostia.
Jokalariak, lehian, beirazko kutxan, iaz Bilbon jokatu
zen Grand Slam torneoan. MIGUEL TOŅA/EFE.
Xake torneorik ikusgarriena jokatuko dute Bilbon
igandetik irailaren 12ra bitartean: Grand Slama. Iaz,
sei jokalari izan ziren finalean, eta, aurten, bi gutxiago izango dira. Grand Slameko zirkuituko lau torneoko -Corus-Wijk
aan Zeek (Herbehereak),
Linares Hiria (Espainia), Mtel-Masters Sofia
(Bulgaria) eta Nanjing Pearl
Springs (Txina) -irabazleek hartuko dute parte.
Lehenbizikoan Sergei Kariakin
errusiarra nagusitu zen, bigarrenean Aleksander Gristxuk errusiarra, hirugarrenean Aleksei
Xirov espainiarra eta, azkenekoan, Levon Aronian armeniarra. Azken
proba horretan, Veselin Topalov
bulgariarra nagusitu zen, baina ez da Bilbon ariko, sariak iazkoak baino
txikiagoak direlako, eta Munduko Txapelketako finala ondo prestatu nahi
duelako. Hala ere, Viswanathan Anand
indiarraren kontrako buruz burukoa ez da apirila baino lehen jokatuko.
Horregatik, Topaloven erabakia ez da xakezaleen oso gustukoa izan.
Bulgariarra egon ez arren, final polita eta kalitate
handikoa izango da Bilbokoa. Alde batetik, edonoren eskura egongo da. Iaz
bezala, isilarazitako eta aire girotutako beirazko kutxa batean jokatuko dute.
Kutxak jende mordoa erakarri zuen iaz. Izan ere, edonork ahal zuen partidak zuzenean
jarraitu eta jokalariak ikusi une oro. Horrez gain, partida guztiak Internetez
jarraitu ahal izan ziren, eta Plaza Berrian beste ekintza batzuk antolatu
ziren: zaleentzat, federatutako jokalarientzat, umeentzat...
Jokalariak pozik azaldu ziren iaz kutxarekin. Barrutik ez
da kanpokoa ikusten, eta zarata ez da sartzen ere. Beraz, eurentzat joko areto
arrunt baten jokatuko balute bezalakoa da ia. Sistema hori Bilbon baino
lehenago Gasteizko supertorneoan erabili zen. Hala
ere, han kutxa hotel bateko gela handi baten barruan zegoen. Bilbon, berriz,
kalean bertan egongo da, Plaza Barriaren erdian.
Gainera, adituak eta jokalari ezagunak izango dira ikusleekin partidak
komentatzeko. Leontxo Garcia
irundarrak izango du horren ardura.
Ikuskizuna guztiaren gainetik.
Torneoko arauak ere apur bat bereziak dira. Ikuskizuna
izan behar da nagusi. Horretarako, jokalariek ezin dute berdinketa adostu,
nahiz eta posizioa berdinketa hutsa izan. Beraz, bietako batek uste badu
partida jada berdinketa egoerara heldu dela, epailearekin hitz egin beharko du
horrek berdinketa adierazteko edo ez. Sofiako araua deitzen deitzen zaio horri, eta helburua argia da: partidak
luzatzea eta denetan borroka egotea. Azken finean, epaileak oso ziur egon behar
du berdinketa adierazteko. Bilboko araua ere erabiliko da. Beraz, iaz
bezala, irabazteak hiru puntu balioko du, berdintzeak bat eta galtzeak batere
ez.
Bi itzulitara jokatuko dute txapelketa -hilaren 9a
atseden eguna izango da-, eta jokalariek ordu eta erdi izango dute lehen 40
jokaldiak egiteko. Horren ostean, bakoitzak ordubete izango du jokaldi guztiak
egiteko, eta hamar segundo irabaziko ditu jokaldi bakoitzeko. 17:00etan hasiko
dira partidak, eta 21:00-21:30 aldera amaituko dira. Halere, ez litzateke
harritzekoa izango partiden bat 22:00 baino beranduago amaitzea. Azken txandako
partidak 16:00etan jokatuko dira.
############
Parte-hartzaileak.
LEVON
ARONIAN.
Herrialdea.
Armenia.
Adina.
26 urte.
Eloa. 2.773
(Maisu Handia).
Munduko
sailkapena. 3.a.
ALEKSANDER
GRISTXUK.
Herrialdea.
Errusia.
Adina.
26 urte.
Eloa. 2.733
(Maisu Handia).
Munduko
sailkapena. 17.a.
ALEKSEI
XIROV.
Herrialdea.
Espainia.
Adina.
37 urte.
Eloa. 2.729
(Maisu Handia)
Munduko
sailkapena. 18.a.
SERGEI
KARIAKIN.
Herrialdea.
Errusia.
Adina.
19 urte.
Eloa. 2.722
(Maisu Handia).
Munduko
sailkapena. 20.a.
############
Š berria.info