GRAND SLAM-EKO XAKE MAISUEN BIGARREN FINALA.

 

 

 

         GRISCHUKEN AGINTETIK ARONIANEN NAGUSITASU-NERA.

 

            Grand Slam-eko II. Finala historia da dagoeneko (2009.go irailaren 6an hasi eta 12an amaitu zen, Bilbon). Veselin Topalov izan zen Grand Slam-eko Finaletako garaileen artean bere izena paratu zuen lehen xakelaria. Levon Aronianek jarraipena eman dio. Galtzen hasi zen, baina izugarrizko erakustaldia eman zuen gero. Iaz hirugarren izan zen, Magnus Carlsen bigarrenarekin puntuz berdinduta.

 

            Torneoa ustekabe batekin hasi zen, Alexander Grischuk errusiarrak Levon Aronian gainditu baitzuen. Munduko hamazazpigarrenak hirugarrena azpiratu zuen.

 

            Bigarren egunean, Grischukek sasoi ona erakusten segitu zuen. Alexei Shirov menperatu zuen. Ordurako, baina, Aronian armeniarrak denbora-pasarako etorria ez zen lehenengo zantzua eman zuen: Sergey Karjakin ukraniarra garaitu zuen.

 

            Grischuk eta Aronian faborito moduan nabarmen agertzen ziren, beraz.

 

            Panorama estutu zen txapelketa erdia jokatuta, Aronianek sailkapenean Grischuk harrapatu baitzuen. Hain zuzen ere, Grischukek, beltzekin, Karjakinen aurka galdu zuen. Aronianek, baita ere beltzekin, Alexei Shirov gainditu zuen. Horrela, Aronian eta Grischuk, 6 puntuz berdinduta geratu ziren buruan. Hurbil, Karjakin, 4 puntuz. Azkena, Shirov, puntu bakarraz, bere Txapelketa izanen ez zen itxuraz.

 

            Aronianek erritmoa hartua zion txapelketari eta laugarren txandan kolpe erabakigarria jo zuen: Mendekua eginda, Grischuk garaitu zuen. Karjakin, Grischukengandik puntu batera geratu zen, Shirovekin berdindu ondoren.

 

            Bosgarren txandak dena ia erabakita utzi zuen. Aronianek erreskadan lortutako laugarren garaipena eskuratu zuen. Orduan, Shiroven aurka. Grischuk-Karjakin partidak gehiago balio zuen bigarren postua eskuratzeko. Berdinketak Grischuk mantendu zuen aurretik. Bitartean, Levon Aronianek, 5 puntuko abantailaz, Topaloven ondorengo txapeldun bere burua bihurtua ikusi zuen.

 

            Aldaketarik ez zen izan azkeneko txandan. Grischukek berdindu zuen Shirovekin, baina nahikoa izan zuen bigarren geratzeko, Karjakinek ere berdinketa egin baitzuen Levon Aronianen aurka.

 

            Ustekabe handirik gabeko Finala izan zen. Ranking-aren arabera zehaztu zen azkeneko sailkapena. Dena den, Letonian jaio eta nazionalitate espainiarra duen Alexei Shirovek espero baino gutxiago egin zuen, hiru berdinketa eta hiru porrotekin, huts egindako Torneoa burututa.

 

            PALMARESA.

 

            2008an, Grand Slam-eko I. Finalean: Veselin Topalov (Bulgaria), garaile; Magnus Carlsen (Norvegia), bigarren; Levon Aronian (Armenia), hirugarren.

 

            2009an, Grand Slam-eko II. Finalean: Levon Aronian (Armenia), garaile; Alexander Grischuk (Errusia), bigarren; Sergey Karjakin (Ukrania), hirugarren.

 

            2009-09-12.