Asteartea, 2009ko irailak 15.

Aronian munduko bigarren postura asko hurbildu da.

Bilboko Grand Slama irabazi du bikain arituta, baina alferrik galdu du Anand gainditzeko aukera.

Josu Tornay. Donostia.

Levon Aronian, Grand Slameko garaikurrarekin. BERRIA.

Amaitu da Bilbon Grand Slameko finala. Aronian zen faboritoa hasieratik, eta iragarritakoa bete da. Armeniarrak 26 urte dauzka, munduko sailkapeneko hirugarren dago, 2.773 elo puntu dauzka Bilbon nagusitu ostean, eta bigarren postutik oso hurbil jarri da. Hori da, hain zuzen, Bilbon alferrik galdu zuen aukera. Azken partidan, torneoa jada irabazita zeukanean, Karjakin gaindituz gero Anand indiarra gainditzeko aukera zeukan; munduko sailkapen orokorrean bigarren jarriko zen horrela, Topaloven atzetik, baina berdinketarekin konformatu behar izan zuen.

Duela pare bat urtetik ari zen Aronian ondo, eta orain ez dago zalantzarik: Zeresana emango du munduko txapelketako sailkapeneko hurrengo zikloetan. Hori bai: Carlsen, Kramnik eta Leko gertu ditu FIDE zerrendetan, baina Aronianen bilakaera eta grina bereziak dira. 26 urterekin, dagoeneko Linaresen eta Wij aan Zeen (birritan) nagusitu da, eta orain Grand Slameko finala irabazi du. Gainera, haren joko ikusgarria zaleen eta antolatzaileen gustukoa da beti.

Aronianek oso torneo ona jokatu du, eta txapelduna zen azken txanda jokatu baino lehenago. Hala ere, azken txandan Karjakin gainditzeak sari berezia zuen armeniarrarentzat: FIDEko zerrendako bigarren postua. Beltzekin jokatu zuen Aronianek, eta irekitze espainolean sartu zen. Karjakinek ez zuen ezustekorik nahi, eta aldaketako bariantea aukeratu zuen. Karjakinek ere berrikuntza bat sartu zuen bariante horretan, eta Aronianek malgutasuna mantentzea aukeratu zuen. Estrategia horrekin, nahiko posizio ona lortu zuen partida bukaeran, baina ez zuen aurkitu errematatzeko biderik onena, eta, azkenean, berdinketa onartu behar izan zuen. Azken jardunaldiko beste partidan, Grischukek lehiakortasun handia erakutsi zuen. Nahiz eta egoera zailean egon -posizioz eta denboraz-, odol hotza mantendu zuen, ondo defendatu, eta azkenean erasotzeko gai izan zen. Shirovek ondo defendatu zuen posizioa, eta berdinduta amaitu zen partida hori ere. Horrela, Grischuk errusiarrak bigarren postuari eutsi zion, eta Shirov ez zen azken lekutik mugitu.

Torneo osoan horrela ibili dira jokalariak txanda bakoitzean. Partida onak izan dira denak, lehiatuak. Bilboko Plaza Barrian ipinitako kristalak hori dena ikusten utzi die zaleei, eta ikusle aldetik arrakasta itzela izan da. Torneo nagusiarekin batera antolatutako beste ekintzetan ere jende askok parte hartu du. Antolatzaileak eta babesleak pozik agertu dira, eta berriro finala Bilbon edukitzea eskatuko dutela gehitu dute.

Etsigarriena Shiroven jokaera izan da. Haren jokoa ez da izan betikoa, eta ez du eman jendeak harengandik espero zuena. 37 urte dauzka, eta atzean geratu dira haren momentu onenak. Munduko hemezortzigarrena da, baina jokalari gazteen kontra gehiago egitea ez da erraza. Bestalde, Karjakinek, Grischukek eta, batez ere, Aronianek erakutsi dute, Carlsonekin batera, prest daudela Kasparoven ondorengo belaunaldi guztia gainditzeko.

© berria.info