Ostirala, 2009ko azaroak 6.
Europarako sailkatu
nahi du Gros xake taldeak asteburuan.
Linex-Magic, Kasparov-Markote eta Sabadell
izango ditu aurkari Espainiako Txapelketako finalean.
Josu Tornay. Donostia.
Asteburuan
jokatuko da Espainiako Ohorezko Mailako Xake Txapelketako Lauko Finala,
Linaresen (Espainia). Izenak dioen bezala, Ligako lau talde onenak ariko dira,
tartean Gros Donostiako taldea. Linex-Magic
(Espainia), Kasparov-Markote (Galizia) eta Sabadell (Herrialde Katalanak) dira beste hiru taldeak.
Espainiako
Txapelketa irabaztea arrakasta handia izango litzateke Grosentzat, Europako
txapelketa garrantzitsuenetako bat baita. Halere, finaleko lehen hiru
postuetako batean sailkatzeak ere saria dauka: Europako Txapelketarako
txartela. Lauko finala gogorra izango da, talde guztiek maila altuko fitxaketak
dauzkatelako. Grosek, hala ere, ez du edukiko taldeko izar handia: Boris Gelfand. Maisu handi
israeldarra munduko zazpigarrena da egun, baina Moskun jokatuko den Mijail Tahlen Oroimenezko
torneoan parte hartzen ari da, eta ezin izango da egon Linaresen. Hala ere,
donostiarrek Etienne Bacrot,
Rustam Kasimdzhanov, Loek
Van Wely, Christian Bauer, Hicham Hamdouchi,
Pablo San Segundo, Roberto Cifuentes, Santi Gonzalez, Iņigo Argandoņa, Patxi Gallego eta Ivan
Muņoz izango dituzte taldean.
Bacrot frantziarra eta Kasimdzhanov uzbekistandarra
onenen artean daude. Bestalde, Van Wely, Bauer, Hamdouchi, San Segundo eta
Cifuentes maisu handiak dira, eta euren
eraginkortasuna Ligan ondo baino hobeto erakutsi dute. Euskal jokalariei
dagokienez, Gonzalez eta Argandoņa gazteek ere, ordezko moduan, izango dute
aukera partidaren bat jokatzeko. Gallego irundarra eta Muņoz donostiarra ere
taldean daude, ordezko.
Maila handiko txapelketa.
Beste taldeen artean faborito nagusiak Linex-Magic eta Kasparov-Markote
dira. Lehenak Gashimov, Mamediarov
eta Vallejo ditu izar ezagunenak, eta bigarrenak Ponomariov,
Xirov, Adams eta Sargissian. Finaleko talde ahulena Sabadell
da. Hori bai, kataluniarrek bakarrik etxeko jokalariekin aritzen dira, eta
horrek meritu handia dauka.
Š berria.info