Asteartea, 2009ko abenduak 8.
Euskal Herria ofizialki ordezkatuz eta «euskal herritar
gisara» kirola egiteko eskubidea izatea aldarrikatu dute kirolariek.
Abenduaren 27an Donostiako Belodromoan 'Kirolharria'
ekitaldia antolatu dute.
Julen Nafarrate. Durango.
‘Euskal Herriko kirolariak’ ekimeneko hainbat kide, atzo
Durangon egin zuten agerraldian. JON HERNAEZ/ARGAZKI PRESS.
«Elkarrekin bide berri bat hastera goaz». Zazpi euskal
lurraldeetako kirolariak bat egin eta bide berean urratsak emateko prest agertu
dira. Helburua: euskal herritar gisara kirola egiteko aukera izatea, inolako
oztoporik gabe. Konpromiso horri helduta, agerraldia egin zuten atzo Durangon
(Bizkaia) 50 bat kirolarik, atxikimendua eman duten kirolari guztien izenean.
«Euskal Herria aintzat hartu eta sentimendu horri uko
egin gabe kirola egin ahal izatea lortu nahi dugu, ez besterik», adierazi zuten
bozeramaile lanetan ibili ziren Mikren Urkiola harri-jasotzaileak eta Mikel
Troitiño surflariak. Han izan ziren, besteak beste, Mikel Aranburu futbolaria
eta Iñaki Errasti arraunlaria ere.
Txirrindulariek, futbolariek, herri kiroletako
ordezkariek, pilotariek... kirol ugaritako ordezkariek batera aritzearen
beharra nabarmendu nahi izan dute, «elkarren babesean, elkar ulertuz, bide
berriak landu eta aukera berriak zabaltzeko» asmoz. Horretarako, «euskal
herritar sentimendua» duten kirolariei dei egin nahi diete, denon artean batera
aritzeko eta indarrak metatzeko: «Ideia nagusi hauekin ados gauden euskal
kirolariok bide berean arraun egiten hastea pauso handia litzateke». Izan ere,
euskal kirolariek beren beharrizanak kontuan hartuz, beren kabuz antolatzeko
asmoa iragarri dute.
Kirolariek egindako hausnarketaren ondorioz, hiru
aldarrikapen nagusi biltzen dituen agiria plazaratu dute. Agirian, «euskal
herritar gisara» kirola egiteko aukera aitortzea eskatu dute kirolariek.
Bigarrenik, nazioartean Euskal Herria ofizialki ordezkatzeko eskubidea izatea
aldarrikatu dute, bakarka zein taldeka. Eta hirugarrenik, aurreko bi
aldarrikapenak posible egingo dituen tresna bat sortzea eskatu dute kirolariek,
eta tresna hori sortzen saiatzeko borondatea agertu dute.
Atzo, Durangoko prentsaurrekoan 50 kirolari bildu baziren
ere, agiriak, oraingoz, Euskal Herri osoko 1200 kirolariren baino gehiagoren
atxikimendua jaso du. Oraindik aldarriari babesa eskaini ez dioten kirolariei
dei egin diete kirolariek. Euskal Herriko Kirolarien webgunean atxikimendua
emateko aukera dute.
27an, «lehen mugarria».
Bidearen helmuga zein den jakinda, bidean urrats zehatzak
emateko prest agertu dira kirolariak. Lehenengo «mugarria» abenduaren 27an
izango da, arratsaldeko 17:30ean Donostiako Belodromoan. Egun horretarako
Kirolharria izeneko ekitaldia antolatu dute. Izenak dioen moduan, «kirola» eta
«herria» lotu nahi dute Belodromoan, eta euskal gizarteari ekitaldian parte
hartzeko deia luzatu diote, «zuzenean ibilbide honen hasieran parte izan
dadin».
Egitarauaren protagonista nagusia kirola bera izango bada
ere, musikariak, bertsolariak eta antzezleak ere izango dira, besteak beste.
Kirolariek aditzera eman nahi izan dutenez, ekitaldia oso garrantzitsua izango
da, aitzindaria izango delako Euskal Herrian: «Aurreneko aldia izango da zazpi
lurraldeetako euskal kirolariok elkartu, eta gure kabuz, guk antolatuko dugun
zerbait egiten dugula».
############
Agiria.
1. Kirola egiterakoan,
Euskal Herria aintzat hartuz, euskal herritar gisara aritzeko aukera izatea.
2. Nazioartean, bakarka edo
taldeka, geure herria (Euskal Herria) ofizialki ordezkatuz parte hartzeko
aukera izatea.
3. Honetarako, zazpi euskal
lurraldeetako kirolariok barne-bilduko gaituen tresna baten beharra aitortzea.
Eta hura sortzen saiatzeko gure borondatea.
4. Aurrez aipatutako
ideiekin bat egiten dugun kirolariok bildu, indarrak metatu eta elkarrekin bide
berri bat hastera goaz (hasi dugu), Donostiako Belodromoan antolatuko dugun
KIROLHARRIA deitu diogun ekitaldian. Eta dei egiten diogu euskal jendarteari
bertara azaltzeko.
############
############
Atxikimenduak.
1.289.
Futbola. Iñigo Velez (Numantzia),
Arrate Orueta (Athletic), Aitziber Juaristi (Athletic), Koikili Lertxundi
(Athletic), Mikel Aranburu (Reala), Dani Estrada (Reala), Iosu Sarriegi
(Panathinaikos), Gaizka Garitano.
Errugbia. Garazi Ibarluzea
(Uribealdea), Aratz Gallastegi (Durango), Ainara Letona (Eibar).
Txirrindularitza. Haimar Zubeldia (Astana), Markel Irizar (Euskaltel), Gorka Beloki.
Pilota. Aimar Olaizola, Oinatz
Bengoetxea, Asier Berasaluze, Xabier Galarza.
Eskalada. Patxi Usobiaga, Gorka
Karapeto, Ander Agirre, Iker Arroitajauregi, Iñaki Marco, Jon Beñat Agirre.
Arrauna. Xabier Bereziartua
(Castro), Iñaki Errasti (Kaiku), Gonzalo Carrion (Hondarribia), Ane Ibarra
(Arkote).
Eskubaloia. Patri Pinedo (Itxako),
Unai Arrieta (La Rioja).
############
Atxikimenduen zerrenda osoa ikusi nahi duenak bisitatu webgune hau: “www.euskalherrikokirolariak.org”.
© berria.info
Xakea. Joseba Otano Villanueva (Arrano Elkartea), Egoitz Irure
Crespo (Anaitasuna Kakute), Xabier Urresti Ortiz (Landetxa), Jon Esturo, Iñaki
Arrizabalaga, Axier Ibaibarriaga, Felix Izeta Txabarri (Gros),