Igandea, 2009ko abenduak 20.

Mikel Huerga nafarrak irabazi du Elgoibarko xake torneoa.

Garaipena lortu ez ezik, Maisu Handiko hirugarren norma ere eskuratu du jokalari iruindarrak.

Josu Tornay. Donostia.

Mikel Huerga xake maisu iruindarrak ezustekoan irabazi zuen hilaren 10etik 17ra jokatutako Elgoibarko torneoa. Huergaren garaipena ustekabekotzat jo daiteke, hura baino izen handiagoko jokalariak aritu baitziren Elgoibarren, baina azken urteotan Huergak izan duen ibilbidea ikusita, horrelako zerbait gertatu beharra zeukan. Nafarraren lan bikainak, gainera, sari bikoitza izan zuen, garaipena lortu ez ezik, Maisu Handia izateko norma guztiak ere lortu baitzituen. Beraz, Felix Izeta erretiratu zenetik Txelu Fernandez eta Mario Gomez Euskal Herriko Maisu Handi bakarrak izan direnei Huerga gehituko zaie aurki. Horretarako, 2500 elo puntuko muga gainditu behar du.

Torneoko faborito handia Oleg Korneev Maisu Handia zen. Errusiarra munduko zerrendetan goialdean ibili da azken hamar urteotan, eta hainbat aldiz nagusitu da Elgoibarren. Azken txandan errusiarrak nagusitzeko aukera zeukan, baina horretarako Alejandro Franco nazioarteko maisua gainditu behar zuen. Hori ez zen gertatu espainiarraren lan onari esker eta berdinketan bukatu zen buruz burukoa. Bestalde, Huergak ez zuen arriskatu, eta Maisu Handiko berdinketa bizkorra eskaini zion David Lariño galiziarrari. Horrek torneoko garaipenaren txapela eman zion Huergari.

Huergak oso ziur jokatu du Elgoibarren. Zazpigarren txandara arte Nazioarteko Maisu guztiak gainditu zituen, eta Maisu Handiekin berdindu. Azken bi txandetan bakarrik, ikusita puntu bat behar zuela norma lortzeko, Astasio FIDE maisuari eta Lariñori berdinketa eskaini zien. Torneoko beste euskal jokalaria, David Astasio arabarra, azkena izan da. Estreinakoa zuen maila horretako torneo batean.

############

Sailkapena.

ELGOIBARKO TORNEOA.

1. Mikel Huerga (Euskal Herria) 6 puntu.

2. Oleg Korneev (Errusia) 6 pt.

3. Dragan Paunovic (Serbia) 5,5 pt.

4. Azer Mirzoev (Azerbaijan) 5,5 pt.

5. Zenon Franco (Paraguai) 5,5 pt.

############

© berria.info