Asteartea, 2010eko martxoak 16.

Botere aldaketa euskal xakean.

Naturgas-Sestao lehen aldiz nagusitu da Euskal Ligan, eta Gros, orain arteko liderra, bigarren sailkatu da.

Josu Tornay. Donostia.

Maxime Vachier-Lagrave, Sestaoko jokalari frantziarra. A. DELLA VALLE/EFE.

1999ko udazkenean irabazi zuen Rey Ardid Bilboko xake taldeak Euskal Liga. Hurrengo urtean, Gros talde igo berria nagusitu zen. Beste horrenbeste egin zuten donostiarrek hurrengo zortzi urteetan. 2000tik 2004ra, Rey Ardid izan zen Grosen arerio nagusia. 2005ean eta 2006an, ordea, Donostiako taldeak ez zuen aurkaririk izan. Atzerritarrak fitxatuta, tituluak eta prestakuntza eraman zituzten Grosera. Etxeko jokalariek, gainera, aurrerapausoa eman zuten. Ordutik, Espainiako Txapelketan goiko postuetan ibili da, Europako Txapelketan emaitza aipagarriak lortu ditu.

Bizkaitik heldu zen susperraldia, 2007an. Naturgas enpresaren laguntzarekin, talde sendo bat prestatu zuten Sestaon (Bizkaia), Ohorezko Mailan lehen aldiz aritzeko. Izen handiko jokalari profesionalak fitxatu zituzten, eta Grosek beste urte batzuetan baino zailtasun gehiago izan zituen titulua eskuratzeko. Sestaok gero eta jokalari hobeak fitxatu arren, donostiarrak jaun eta jabe ziren. Haientzat izan ziren 2008ko eta iazko txapelak.

2010a, baina, Sestaoren urtea izan da, azkenean. Babesleak pazientzia izan zuen, eta laugarren urtez jarraian taldea diruz lagundu ostean, emaitzak heldu dira. Bat guztien gainetik: Euskal Liga irabazi dute lehen aldiz, eta Grosen diktadura amaitu.

Sestaok talde bikaina izan du sasoi honetan. Horretarako, jokalari garrantzitsuak fitxatu zituen; tartean, hiru supermaisu handi: Hikaru Nakamura, Nigel Short eta Maxime Vachier-Lagrave. Aurreneko biak ez dira aritu Euskal Ligan, Espainiako eta Europako txapelketetan aritzea nahiago izan baitu taldeak. Vachier-Lagravek, berriz, partida bakarra jokatu du, joan den larunbatean, azken jardunaldian. Euskal Ligako taldearen bizkarrezurra honako jokalariek osatu dute: Romain Edouard, Jean Noel Riff, Stuart Conquest, Gabriel del Rio, Alfonso Romero eta Mario Gomez.

Grosek ere talde ona zeukan: Rustam Kasimdzhanov, Christian Bauer, Etienne Bacrot, Loek Van Wely, Hixam Hamdouchi, Pablo San Segundo, Roberto Cifuentes, Glenn Flear... Klubak, baina, apustu arriskutsua egin zuen: Euskal Ligan euskal jokalariak bakarrik aritzea, eta atzerritarrak Espainiako eta Europako txapelketetan. Hala, Alejandro Francok, Mikel Huergak, Santi Gonzalezek eta Iñigo Argandoñak jokatu dute.

Hala ere, Sestaoren aurkako norgehiagokan bi taldeak onenekin aritu ziren: Sestaon, Alexander Moiseenko, Andrei Istratescu, Del Rio eta Romero aritu ziren; eta Grosen, Bauer, Hamdouchi, Cifuentes eta Huerga. Grosek galdu zuen etxean (1,5-2,5). Lehen hiru tauletan berdinketak izan ziren, eta laugarrenean, Huergak Romeroren kontra galdu zuen.

Joan zen larunbatean jokatu zen Euskal Ligako azken txanda, Donostiako Karmelo Balda frontoian. Ordurako, baina, Sestaok patrikan zuen titulua. Izan ere, aurreko jardunaldian, zortzigarrengoan, Sestaoko laukoteak 4-0 gainditu zuen Easo, eta Grosek 3-1 irabazi zion Iruñeko Orvinari.

Liga erabakita izanagatik, azken txandarako talde ederra aurkeztu zuen ere Sestaok (Vachier-Lagrave barne). Grosek, berriz, bigarren postua ziurtatu nahi izan zuen. Eta lortu zuen, Barakaldori 0-4 irabazita. Subijanako Ruta de Europarentzat izan da hirugarren postua Euskal Ligan. Arabarrek oso torneo polita egin dute, eta azken txandan justu-justu eman zuten amore Sestaoren aurka: 2,5-1,5 galdu zuten. Lehen taulan Jesus Iruzubietak Vachier-Lagraverekin berdindu zuen. Hori lortuta, historia egin zuen Iruzubietak. Izan ere, bera izan da 2.700 elo baino gehiago duen jokalari baten kontra punturen bat lortzen duen lehen euskal jokalaria.

Orvina behera, Zuri-Baltza gora.

Bestalde, ikusmin handia zegoen jakiteko zein talde jaitsiko ziren Lehen Mailara, eta zeintzuk igoko ziren maila nagusira. Azkenean, Ohorezko Mailatik Iruñeko Oberenak galdu du maila, eta Barakaldok jokatu beharko du jaitsiera saihesteko kanporaketa. Aretxabaletako Arlutzek balentria egin du berriz ere, eta mailari eutsi dio.

Euskal Ligako Lehen Mailari dagokionez, txapelketa oso parekatua izan da, eta lehia gogorra izan da azken jardunaldira arte. Azkenean, Bilboko Zuri-Baltza nagusitu da 21,5 punturekin. Santutxuko talde historikoak azken txandan ziurtatu zuen maila gorenerako txartela, 1-3 Errenteriako Kultur Sustapen taldea gainditu ondoren. Sestao-Naturgas B izan da bigarren sailkatua Lehen Mailan, puntu berdinekin baina berdinketa hausteko koefiziente txarragoarekin. Hala ere, Naturgas-Sestaoren bigarren taldea izanik, ezin da mailaz igo. Beraz, Rey Ardid Bilboko taldeak jokatuko du Ohorezko Maila igotzeko kanporaketa Barakaldoren kontra. Bilbotarrek igoera lortuko balute, Bizkaiko hiriburuko bi talde historikok parte hartuko lukete Ohorezko Mailan datorren urtean.

Gros euskal jokalariekin aritu da lehia askotan, eta garesti ordaindu du.

© berria.info